بلعت ريقها برعب وهي تنتبه لكذبتها الصغيرة التي سوف تكلفها الكثير:
– صعب أوي .. كل يوم أقول لازم أقول لها .. كل يوم قلبي بيوجعني وهي بتسألني عن أبوها … نفسي أنسى وكل ما أبص في وشها افتكر كسرته لي .. مش قادرة أصارحها دلوقتي.. خايفة تتوجع زيي .. خايفة تحس إنها اتسابت زي ما أنا اتسابت زمان .. اكتشفت إني اختياري الغلط بتعاقب عليه في كل لحظة .. حتى بنتي بقيت خايفة إنها هي كمان تيجي يوم وتسيبني
– دانا بتحبك جدا .. ومستحيل هي كمان تسيبك.. وأنت دلوقتي أحسن من زمان بكتير أوي .. أنت دلوقتي قوية .. واحدة غيرك مكنتش استحملت كل ده واستسلمت.. صدقيني بكرة ربنا هيعوضك ويجيبلك حقك من اللي ظلمك .. بس أنت اعملي زي ما بقولك و صارحي بنتك من دلوقتي بالحقيقة
______
ذهبت كاميليا لتأخذ ابنتها من الحضانة وأخذتها معها إلى مقر العمل الذي أرسلت إليه السيرة الذاتية لكي تعمل معهم بالشركة
تحدث كاميليا بابتسامة لموظفة الاستقبال:
– مساء الخير..كنت عايزة أقدم على الوظيفة المطلوبة .. كنت بعت ال CV بتاعي لحضرتك
– ممكن الاسم؟
– كاميليا مجدي
– تمام .. اتفضلي مستر رأفت هيخلص الميتنج اللي معاه ويعمل معاك انترفيو
بعد مرور دقائق .. خرج رجل في نهاية الثلاثينيات من عمره .. فنظر إلى كاميليا وتفحص مظهرها سريعا :
– أنتِ باشمهندسة كاميليا ؟
– أيوة انا
– ممكن تتفضلي مكتبي
همست دانا بخوف:
– مامي .. أدخل معاكِ
ابتسمت كاميليا برقة:
– خليكي يا دانا هنا.. علشان أعمل انترفيو
نظر لها رأفت متفحصاً إياها ثم نظر إلى يديها ليرى إن كانت ترتدي دبلة أم لا ثم سألها بتوجس:
– دي بنتك ؟
– اه.. كانت في الحضانة بس وجبتها معايا علشان مكنش فيه وقت أروحها
– تمام مفيش مشكلة ممكن تستني هنا مع أميرة لحد ما نعمل انترفيو و نشوف
– تمام خليكي مع طنط يا دانا
دانا بأدب:
– حاضر يا مامي .. متتأخريش
دلفت كاميليا إلى مكتبه .. وجلست على الكرسي المقابل له فسألها بشك :
– بس حضرتك يعني مش لابسة دبلة .. هو بابا بنتك فين؟
زفرت كاميليا بغيظ لتدخله فيما لا يعنيه ولكن لا يهم هي تريد الوظيفة :
– منفصلين
كتم فرحته بداخله قائلا بغزل:
– إزاي حد يسيب واحدة زيك
همست كاميليا من بين أسنانها :
– عادي متفقناش.. ممكن تفاصيل عن الشغل أكتر
ابتسم بمكر:
– اه اه طبعا.. شوفي يا مدام كاميليا.. في كذا بنت مقدمة على الوظيفة دي غيرك.. بس أنا قررت اوافق عليك .. ومش بس كده .. بمرتب أعلى كمان من اللي محطوط.. ضعف المرتب يعتبر
كاميليا باستغراب:
– معقولة … أنا متشكرة أوي لحضرتك.. بس حضرتك عجبك ال CV بتاعي يعني عشان كده وافقت علي
غمز لها قائلا:
– ال CV وصاحبته كمان اللي زي القمر
نظرت اليه باستغراب :
– هو ده انترفيو شغل ولا غزل ومعاكسة ؟؟