غاصت يداها في خصلات شعرها وهمست بتوتر:
-لحد ما ييجي الوقت اللي تقدر تفهم وتستوعب الحقيقة
سألتها والدتها بغضب:
-وامتى ده إن شاء الله .. ولا أوعي تكوني مستنياه يرجع !
اعتدات كاميليا في جلستها وههمست:
-لا اطمني هو مش هيعرف يرجع خلاص… عارفة ليه! عشان عرفت النهاردة إنه متجوز بقاله سنتين
وغير كده انتِ عارفة اني مستحيل ارجع للبني ادم ده تاني
جحظت عيناها بصدمة قائلة:
– اتجوز ! و دي إيه ظروفها بقى! شبهه كده و..
قطعت حديثها وقد ملئت عيناها بالدموع قائلة :
– لا خالص .. خالص يا ماما.. الطيور مطلعتش بتقع على أشكالها المرة دي زي ما بيقولوا.. اللي سمعته إنها أدب إيه وأخلاق إيه و جمال إيه !
قلبت عينيها بملل وقالت:
– مالك بتشكري فيها أوي كده .. ليه وهو أنت وحشة مثلا ولا قليلة !
وضعت يدها على قلبها قائلة بسخرية:
– لا بس أنا فاشلة .. مش ده كلامك يا ماما !!
أنا فشلت .. فشلت أنجح حياتي معاه.. وفشلت في اختياري لشخص مش كويس زيه
هزت رأسها تنفي حديثها :
– لأ يا كاميليا لأ ..
أجابت كاميليا بعبوس سرعان ما تحول لصراخ:
-هو ايه اللي لأ
-خلاص كفاية كفاية
انهارت باكية بصوت عالى وصرخت بقهر:
– نعم؟؟؟ مش ده كلامك يا ماما !! ده كلامك أنت لي كل يوم وكل دقيقة …
لم تستوعب كاميليا للحظات وهي تستكمل حديثها إلى أن شعرت بعِناق والدتها وهي تقاطعها بقهرة :
– ده كلام أم .. أم موجوعة على بنتها .. كلام أم كبرت و ربت وفرحت وبعدها اتكسرت فرحتها لما بنتها رجعتلها مطلقة وحامل في بنت تربيها لوحدها.. كلام أم قلبها بيوجعها وخايفة على بنتها اللي الناس مش سايباها في حالها .. كلامي خارج من نظرة الناس اللي حوالينا لك وتصرفاتهم الحقيرة معاك .. غصب عني يا كاميليا .. غصب عني صدقيني
المطلقة ليست زوجة فاشلة بل صاحبة خبرة ثاقبة ففشلها مع رجل لا يدل على فشل مع كل رجل, ولعل الطلاق لم تكن سببه المطلقة وانما هي امرأة منطلقة لا تعرف معنى التردد والخوف ورخصة الطلاق جاءت في موضع الدواء والطلاق علاج من رب العالمين لا عقوبة تعاقب بها المرأة.
المطلقة قد تكون انجح واكثر استقامة من المتزوجات والأمهات المستقرات
_________
في الصباح
بعد أن وصلت ابنتها للحضانة وهي في طريقها للعودة إلى شقتها.. ذهبت إلى شقة جارتها جهاد لتتحدث معها وتنبهها لشيء بخصوص دانا
استقبلتها جهاد قائلة بترحيب:
– أهلا يا كاميليا ازيك .. دانا عاملة ايه؟