ردت فاتن بتصميم:
– لا بقولك ايه….احنا مش هنزعل على الزفت سامج ده ولا يستاهل اصلا دمعة واحدة…اسمعي احنا هنخرج النهاردة…وهنروح ماكدونالدز إللي في كايرو فستيفال سيتي ..
وتطلبي اغلى حاجة هناك ونلف شوية بقى.. وبعدها نتمشى شوية بالعربية بتاعة جدو وكمال هو اللي هيسوقها
همست بضعف :
– لأ مش هقدر .. روحوا انتوا
دلف كمال إلى الغرفة قائلا بحزم :
– لا بقولك ايه احنا هنخرج النهاردة..والله ما هنسيبك اليوم ده لنفسك وافكارك
احنا النهاردة هنخرج سوا أساساً
ليضيف بشقاوة:
– ده انا هخرجك خروجة تحلفي بيها
ابتسمت كاميليا بتعب قائلة:
-ربنا يخليكو ليّ…انتوا احسن اخوات في الدنيا
بالفعل خرجوا سوياً وحاولوا أن يشغلوا أختهم عن الطلاق والتخفيف من حدة الموقف
كن على يقين تام من أن اللحظة ، مهما كانت ثقيلة ، ستمر … ستمر بأي طريقة وبأي وسيلة
________________________________
في صباح اليوم التالي
– كوكي حبيبة قلبي .. صحيتي ؟
قالتها فاتن وهي تدخل غرفة كاميليا
ابتسمت كاميليا:
– اه يا تونا تعالي..
دخلت فاتن الغرفة فجلست على سريرها بجوارها وقالت لها :
– حجزتلك مع دكتورة شاطرة جدا .. هي ثيرابيست ناجحة جدا وهتسمعك كويس أوي .. وهتساعدك تتخطي التجربة اللي مريتي بيها
نظرت إليها كاميليا بامتنان وهي تقول:
– متشكرة أوي يا تونا.. أنت أحسن أخت في الدنيا كلها
عانقتها فاتن بحب وقالت لها :
– متقوليش كده أنا جنبك.. و واثقة إن ربنا هيعوضك
ثم أومأت قائلة بتذكر:
– يلا ميعادك معاها النهاردة بالليل .. هوصلك وأروح اخلص شوية حاجات و ارجع اخدك
_______
مهما حاولت، وحلّلت وفكّرت لن يغير الماضي في شيء.. لهذا كُنْ شاكرًا فقط لتِلك التجارب.. وامضِ قدمًا.
فى المساء ذهبت كاميليا إلى عيادة الأخصائية النفسية
تحدثت معها عن معظم الأشياء التي حدثت لها وبعد مرور أقل من ساعة
تحدثت الأخصائية النفسية قائلة:
– كاميليا .. أنتِ تستاهلي حد أحسن من كده … اللي زي ده محبش ولا عمره يعرف يحب
أغمضت عينيها بتعب:
– بس يا دكتورة … انا حاسة إني مش قادرة أفوق..مش قادرة أبطل ألوم نفسي على كل حاجة.. وإني أنا اللي عملت في نفسي كده .. من أول ما وافقت على الجواز من واحد زيه لحد آخر لحظة رجعت له فيها قبل الطلاق..
– “الضربة والماضي صحيح بيوجع بس أما تعيش فيه أو تتعلم منه”
الجملة دي كانت في كرتون سمبا.. تبان بسيطة لكن تطبيقها عايز مجهود ..
عشان كده خدي وقتك من الألم متقاوميش احنا بشر وإن شاء الله هتتعافي وتتعلمي وربنا كريم وكبير وعوضه جميل