– مدام كاميليا أنا هقدملك تقارير طبية تروحي بها دار الإفتاء تاخدي موافقتهم على عملية إجهاض البيبي وأي دكتور هيعملها لك .. صدقيني ده أحسن لك ولها .. حرام تظلمي نفسك
*******
-هى كاميليا فين؟
تفوهت بها والدة كاميليا لكمال ابنها الصغير
رد عليها كمال قائلًا:
-شوفتها من شوية كانت جاية من بره من عند المحامي تقريبا.. ناديت عليها لكن مسمعتنيش
نهضت الأم “صفاء”:
-طيب أنا هروح أشوفها
ذهبت إلى غرفة ابنتها .. طرقت الباب عدة مرات لكنها لم تفتح وكذلك لم تجب ..فحاولت أن تفتحته لكن بلا فائدة فهي أغلقته من الداخل.. فخرج الجد من غرفته على صوتها
قالت صفاء بقلق :
-كاميليا افتحى الباب
لم تسمع صوتها فقال جدها بصوت عالى :
-يا كاميليا افتحي..
خرجت فاتن من غرفتها واقتربت هي وكمال من والدتها.. ثم فتحت كاميليا الباب قائلة بانهيار:
– أكيد أنا وحشة أكيد أنا السبب .. يمكن العيب كان مني أنا .. معرفتش أعمله كل اللي هو عايزه
هزت فاتن رأسها بنفي :
– لا يا كاميليا أنتِ مش وحشة ولا أنتِ السبب .. هو اللي سلبي و ابن أمه ومعندوش ثقة في نفسه ولا في حد أصلًا و بيطلع عقده عليكِ .. صدقيني بكرة ربنا هيعوضك باللي يتمسك بكِ ويحبك.. أنتِ لسه صغيرة والحياة لسه قدامك وطول ما أنتِ
مظلومة اتأكدي إن ربنا هيعوضك عوض هينسيكي إللي أنتِ فيه دلوقتي وهيجى يوم تضحكي على الأيام دي و وقتها هفكرك.. بس أنتِ ارمي ورا ضهرك وعيشي حياتك وكملي دراستك .. كملي الـ ٣ سنين إللي فاضلين في الكلية واشتغلي و
عيشي علشان بنتك إللي جاية
رد كمال شقيقها الصغير :
– الطلاق ده مش آخر الحكاية ولا آخر الدنيا
أخذتها أمها في حضنها وجلست معها على سريرها وهي تحاول تهدئتها:
– ادعي يا كاميليا .. ادعي ربنا يا بنتي وقولي دايما اللهم أجرني في مصيبتي و اخلفني خيرا منها يارب… و إن شاء الله ربنا يعوضك كل الخير و عن كل إللي مريتي به
أومأت فاتن بإيجاب:
-فوضي أمرك لله واتفرجي على حقك وهو بيرجعلك ولو بعد حين واتأكدي طول ما أنتِ مظلومة ربنا هيعوضك أكيد بأمر الله ده وعد ربنا لنا
صرخت كاميليا بقهر:
– ليه هو إللي سابني بعد كل ده هو اللي سابني !! .. أنا حبيته واستحملت كل ده علشانه يا ماما .. وكنا ممكن نكمل لو عيشنا في شقة بعيد عن أهله .. ليه كل ده .. ليه أصلًا
مكملناش