جذبتها فاتن من حجابها بعنف :
– أنا أختي أشرف منك يا حيوانة .. اشرف منك ومن عيلتك كلها … واحنا واثقين فيها مش محتاجين أي دليل .. أختي متربية أحسن تربية مش زيك يا قذرة…وبرضو مش هنتنازل عن المحضر وهنوديه في ستين داهية
فقام زوج سميحة بفك التشابك بينهما بصعوبة وتدخل جد كاميليا بينهم محاولًا منع الشجار والفضائح
__________
بعد خروج كاميليا من المستشفى وبعد تعافيها قليلًا مما حدث لها
قالت كاميليا بصدمة لأمها وجدها:
– بيهددني يشوه سمعتي عشان أتنازل !!
شهقت امها بقهر :
– معلش يا بنتي .. إنسان حقير هنقول إيه
صرخت بوحشية والدموع تملأ عينيها :
– بس ده ظلم .. ده أكبر ظلم اللي عملوا
تحدث جدها قائلا بغيظ:
– المصيبة إني اكتشفت إن في حد ورا حوار إن اسمك ميتكتبش في السجلات المحاضرات.. واضح إن أخته هي اللي لعبت اللعبة دي
ثم أردف :
– أكيد جوزها الحيوان ده ساعدها
صرخت كاميليا باتهام مندفع:
– انت السبب يا جدو … انت وعمي السبب.. انا مش مسامحاكم ضيعتوا حقوقي
خليتوه هو اللي يطلقني…ويضربني تاني كنت هموت في ايده
ليه عملتوا فيا كده !!؟
ليه
حاول الجد الاقتراب منها والاعتذار لها ولكنها ابتعدت عنه وهي تضع يدها على وجهها تكتم شهقاتها العالية:
– انا اتظلمت
ظلم كبير اوي
ضربني بطريقة عمري في حياتي ما هنساها.. انا شوفت الموت بعيني !
ليه عملتوا فيّ كده ؟
عشان مبقاش مطلقة ! اتطمنوا دلوقتي بقيت مطلقة
عانقتها امها تحاول تهدئتها وعيناها تدمع:
– حسبي الله ونعم الوكيل في سامح وأهله … فوضي امرك لله يا كاميليا…حقك عليا والله ما هسكت وانا معاكي في أي حاجة
همس الجد بندم شديد:
– سامحيني يا حبيبتي… والله ما كنت اعرف ان كل ده هيحصلك…حقك عليّ يا حبيبة جدك والله ما هغصبك على اي حاجة ابدا اللي أنتِ عايزاه بعد كده يتعملك
هتفت بنبرة باكية:
– بعد ايه !؟
بعد ما حياتي اتدمرت
انت مشوفتش ضربني ازاي
محستش بوجعي
محستش بالظلم اللي انا حسيته
لترتجف برعب هامسة :
-رجعتني لواحد باعني وطلقني ومصدقنيش .. ولولا رحمة ربنا وان اخته الحرباية دي اتدخلت في آخر لحظة كنت هموت…والله كان هيموتني