– تسلموا يا حبايبي..ربنا يتمملكم فرحتكم على خير ويرزقكم الذرية الصالحة..
اوصاه منصور برجاء:
-خد بالك منها يا فراس دي هتسافر في بلد تانية
– في عينيا والله…
همست السيدة منى بإعجاب:
– ايه القمر ده يا فريدة
-حضرتك نورتيني يا طنط
– حبيبة قلبي…ماشاء الله عروسة قمر…هتسافروا امتى؟
– هنقعد كام يوم بس انا وفريدة نرتاح من تجهيزات الفرح وبعدين نسافر أن شاء الله
بعد دقائق اقتربت منهم جهاد وبيدها كلا من طفليها عمر و زينة :
– الف مبروك يا فراس
– اهلا ام عمر…ازيك
– الحمدلله…مبروك يا فريدة يا حبيبتي..
– الله يبارك فيكي يا قمر
اقترب منصور ومنى من كاميليا الواقفة بجانب زوجها وهي ترتدي فستان نبيتي جميل :
– ازيك يا كاميليا…عاملة ايه دلوقتي؟
– الحمدلله هانت
– عرفتوا ولد ولا بنت؟
– ولد
ابتسم منصور بتمني:
– ماشاء الله…ربنا يقومك بالسلامة يا حبيبتي..
– ربنا يخليك يا Uncle
أجلى صوته قائلا بأسف:
– كاميليا… انا اسف لو كنت زمان خايف على ابني…انا فعلا اتأكدت أن انتي الوحيدة اللي كنتي تستاهلي ابني وتسعديه…خلي بالك من نديم…نديم مش عشان ابني…بس هو أطيب و أحن راجل في الدنيا…
اومأت كاميليا بصدق :
– ده انا اللي محظوظة به جدا…نديم مفيش زيه فعلا
وانا مش زعلانة من حضرتك…حضرتك أب وكنت خايف على ابنك..
– ربنا يسعدكم يا حبيبتي…و تقومي بالسلامة أن شاء الله
– امين يارب
حذرتها السيدة منى بمرح :
– بقولك يا كوكي يا حبيبتي…اوعي بقى تقولوا هنسمي منصور و على اسم باباه والجو القديم ده
رفع منصور حاجبه بتعجب:
– بقى كده؟
ردت بتبرير:
– بصراحة بقى الولاد يسموا براحتهم…ليه نظلم الطفل ونسمي على اسم الجد… حرام نسميه اسم جديد
– لا وأنتي اللي اسمك لسه نازل حديث السنة دي
هزت كتفيها بلامبالاة:
– ولا اسمي ولا اسمك …يختاروا لوحدهم… الا بقى لو كان اسم الجد حديث كده ماشي نمشي الدنيا
قهقت كاميليا بضحكة:
– والله يا طنط حضرتك زي السكر…
– حبيبتي يا كوكي…ربنا يعلم انا حبيتك قد ايه وكأنك زي سارة بالظبط
همست كاميليا بأدب:
– احنا هنسمي ادم…ده بعد اذن حضرتك طبعا يا Uncle
أجابها منصور :
– انتي تختاري اللي انتي عايزاه اصلا .. انا بهزر…انتي تعبتي فيه ولو نديم نفسه اعترض قوليلي وانا أتدخل
– لا هو مقتنع بالاسم و بقى حابه كمان
– ربنا يقومك بالسلامة يارب
تدخل نديم قائلا بأدب:
– تسمحولي اخد مراتي الجميلة منكم دقائق
– بس متأخرهاش علينا
سحبها من يدها بعيدا عنهم…لتهمس بسعادة :
-مبسوطة عشان باباك بقاله فترة بقى قريب مني وبقى بيحبني زي طنط منى
اقترب مقبلاً وجنتها :
-أي حد يعرفك لازم يحبك يا قلبي
ليردف بتأكيد:
-أنتِ تتحبي بصراحة
ضحكت بدلال :
-ياربي…انا بعشقك يا نديم والله