تجاهلها وهو ينظر إلى دانا :
– خلاص يا كاميليا .. مفيش حاجة اقعدي مع بنتك
همست كاميليا بنفي:
– لا طبعا دانا مش هترضى تاكل من غيرك
لتضيف بدلال :
– ولا انا أقدر برضو
رد برسمية:
– خلاص هقعد عشان دانا متاخدش بالها
هناك شخص يجعلك تشعر بالقرب منه.
إنك أفضل .. إنك أقوى ..
إنك الأجمل..أنك الأفضل!
يجب الحرص على عدم الإفراط فيه
فهذا لا يتكرر عادة!
____________
في اليوم التالي
في الشركة
كانت تجلس معه في مكتبه … لتهمس بحرج :
– نديم متزعلش بجد انا مقصدش.. انا بس كنت حاسة انك بتعمل حاجات كتير مش مطلوبة منك وحاسة أنك مش المفروض توافق على كل ده
زفر نديم بانزعاج :
– وهو انا كنت اشتكيتلك ؟
كاميليا انا فعلاً بحب دانا ومش عارف ليه بحس اني مسؤول عنها مش هقولك اعتبريني ابوها لأن باباها عايش
هزت رأسها قائلة بصدق :
– لا يا نديم … انت فعلا كأنك ابوها… ابوها اللي عايش ده مجرد اب بالاسم
همس بنبرة حاسمة :
– كاميليا انا فعلا بخاف على دانا وعليكي ومن يوم ما اتجوزتك وانتوا مسؤولين مني وهتفضلوا كده
تمتمت بأسف :
– انا اسفة
رمقها بغيظ:
– وبالنسبة للكلام السخيف اللي قولتيه امبارح ده؟
هزت كتفيها بدلال:
– اعتبر ولا كأنك سمعته اصلا !
لتضيف برقة وهي تجلس بالقرب منه على الأريكة التي بالمكتب :
– وحشتني على فكرة
ابتسم قائلا:
– وانتي كمان وحشتيني اوي يا كراميلا .. مش عارف اتلم عليكي في البيت براحتي
قهقهت قائلة:
– لا متنكرش انها بقت تسيبنا اكتر من الاول
قطب جبينه بعبس:
– اه بس مش زي ما كنا في باريس
– اهو احسن من مفيش