– مش قادرة اصدق أنه بيتهمني تاني اني خونته
رد بإستغراب متذكرا:
– انا مقصدش بس … هو سامح بيتهمك انك خونتيه.. هو ليه قال كده
قاطعته بغضب :
– كذاااب … ده بني ادم واطي وكذاب .. انت مش عارف عمل فيا ايه هو واخته وأمه
لتقص عليه كل ما حدث لها من طليقها وعائلته:
– ده مش راجل يا كاميليا … اوعي تزعلي ولا تضايقي ده مش راجل اللي يعمل كده … ما يروح يتأكد في 100 حل .. كان ممكن يروح الجامعة ويتأكد من زمايلك من الدكاترة نفسهم… أي حل الا كده
صاحت بغيظ :
– دمرولي حياتي منهم لله .. العيلة كلها قرف هو و اخته سميحة وأخوه سميح وأمه سماح
اتسعت عينا نديم بدهشة :
– سامح وسميح وسميحة وسماح !
ليردف باستنكار ساخر:
-ده ايه العيلة اللي اسمها عكس نيتها دي !
قهقت كاميليا ضاحكة بشدة
فابتسم نديم برقة :
– أيوة كده اضحكي .. و انسي .. صدقيني يا كاميليا كل اللي فات ده خلاص راح .. ورا ضهرك
أشاحت بوجهها وقد عادت دموعها تتدفق بغزارة فوق وجنتيها عندما تذكرت ما قاله لها:
– طب هعمل ايه دلوقتي .. ده بيهددني يتأكد ومش هيسكت…واللي هيجنني أنه في نفس الوقت قال ايه عايز يشوفها لو طلعت بنته
نديم من بين أسنانه :
– انا مش عارف الحيوان ده عايز ايه تاني .. بصي هو في حل انا عارف يا حبيبتي انك هترفضي وتضايقي بس متبصيلهاش كده .. بصيلها أنك بتخرسيه هو وعيلته كلهم و نقطع لسان سامح ده عشان يغور بعيد عننا
هزت رأسها باستنكار:
– حل ايه ؟؟؟ قصدك التحليل !
نعمل تحليل لسامح !! انت بتهزر..
نديم بإصرار:
– لا يا كاميليا… انا كده كده ميفرقش معايا في حاجة قسماً بالله… بس انا كل اللي فارق معايا انتي .. عايزك تاخدي حقك منهم كلهم وانتي زي ما انتي مش عاملة حاجة غلط.. عايز نحط آخر نقطة في حوار سامح ده عشان نخلص منه .. وقتها
سامح ده ما هيقدر يتعرضلك تاني لانه شك فيكي بطريقة بشعة… ولأني هعمل حاجة اخليه يتكتم خالص وهو وقتها اللي هيترجى يشوف بنته وهيندم على كل حرف قاله
اعتصر قلبها بأنين:
– بكرهه بكرهه أوي نفسي تحصله اي حاجة بجد.. اي حاجة تخرسه وتبعده عني.. انا بقيت خايفة
وعدها برقة:
– متخافيش ابدا طول مانا جنبك ومعاكي.. المهم نخلص من حوار التحليل ده وبعدين نحدد ميعاد فرحنا
أخفضت عينيها بتردد وهمست:
ـ تفتكر اللي هنعمله ده صح
…
تفتكره نديم ناوي على ايه مع ؟
وكاميليا هتوافق تعمل التحليل ولا لأ ؟
ايه رأيكم في موقف منصور تجاه سامح ؟
ايه رأيكم في موقف منصور مع نديم؟
*****