بنفس القدر الذي تستطيع فيه استفزازه وإثارة حنقه.
هتف مؤكدا: الموضوع بسيط، كل ما سافرتي واحتكيتي بشعوب كتير، اتعلمتي لغتهم وخاصة لو عشتي وسطهم عشان الدراسة، وده اللي حصل معايا مش أكتر.
هزت رأسها متفهمة، وأشارت للموسيقي، والغناء الذي تصاعد وتيرته: هو فيه إيه، الحجة مالها!
ابتسم رغم سخريتها، لاستشعارها وقع الموسيقي والغناء مؤكدا: برافو عليكِ، أهو فهمتي إن في حدث مهم، دي أوبرا من أروع مسرحيات الأوبرا اللي بحبها جدا، يمكن عشان فيها طابع مصري، اسمها أوبرا عايدة.
هتفت في فرحة: عايدة، على اسم أمي الله يرحمها.
هتف في تهذيب: والدتك اسمها عايدة!
هزت رأسها مؤكدة، ووجدها تجلس على أحد المقاعد الجانبية في استكانة، هي نفسها لم تعي أنها فعلت، وهي تتطلع نحوه تطالبه بإكمال الحكاية، ليستطرد : المشهد اللي سمعتيه ده، صرخات عايدة، لما حبيبها مات.
هتفت مذعورة: مات!
هز رأسه: وهي كانت عايزة تحصله.
أكدت بشجن: عندها حق، ما يا نعيش عيشة فل، يا نموت إحنا الكل.
أمسك ضحكاته على ضحكاتها، مستطردا الحكي: اتسللت عايدة عشان توصل للقبر قبل ما يقفلوه، واندفنت معاه.
شهقت في صدمة: أد كده كانت بتحبه!
هز رأسه مؤكدا: آه.
هتفت متنهدة: أحسن برضو إنها تموت معاه.
تطلع نحوها مصدوما: إيه الكلام العجيب ده!