فقالت إنك تبيعه وتاخد تمنه، وهي جوزها هيجيب لها أحسن منه هناك.
هتف صبحي في شدة، يهزها من جديد: ومين اللي قال لسلامات أصلا، إن أنا اللي دفعت تمن تذكرة السفر!
تلعثمت الكلمات على لسان خيرية، هاتفة تنفي التهمة عنها في عجالة: معرفش، أنا ايش عرفني اللي بينك وبين
أختك! ما يمكن يكون المحروس جوزها هو اللي قال لها!
دفع صبحي بخيرية في عنف، لتسقط على أقرب مقعد لها، زاعقا فيها بثورة: والله العمايل دي ما تخرج إلا من تحت إيدك، لأن جوز سلامات هو اللي بعت تكاليف كل حاجة، وأنا مدفعتش مليم ف أي حاجة تخصها.
لم ترد بحرف، خوفا من أن يؤخذ عليها لاحقا، لذا أثرت الصمت، وقد انكمشت موضعها في قلق، حين اقترب منها صبحي، هاتفا بنبرة تهديدية: اللي كان بيحصل بينك وبين سلامات أنا مكنتش بدخل فيه وساكت وبقول شغل حريم ويصطفلوا سوا، لكن والله يا خيرية لو عرفت إن في حاجة حصلت لسلامات فالغربة من تحت راسك، ما هيكفيني فيكِ روحك.
ابتعد عنها متنهدا في حنق، وهو يتطلع لهاتف أخته، لا يعلم كيفية التصرف في هذه اللحظة، يتضرع لله داخليا، أن تكون بخير وسعادة.
نهضت خيرية تقترب منه في مهادنة، هامسة وهي تربت على كتفه، في محاولة لامتصاص غضبه: والله سلامات بخير، وزمانها مبسوطة وعايشة أحلى عيشة كمان، أهدى بس، وأكيد هي أو جوزها هيردوا ع التليفون ويطمنوك.
دفع كفها عن كتفه، مندفعا في اتجاه الخارج، تاركا إياها تضرب اخماسا في اسداسا، تتمنى للمرة الأولى بحياتها، أن تكون سلامات بخير، وإلا لن تكون العواقب سليمة.
***************