أشار لها أيوب لتجلس على أحد المقاعد، قبل أن يمد كفه بقنينة دواء، هاتفا: ده دوا ساجد، كتبه له الدكتور من فترة، نسيت اديهولك إمبارح مع ملف حالته.
تطلعت للدواء في حنق، هاتفة: أنا كنت لسه هسأل حضرتك، إذا كان بياخد أي أدوية من اللي لقيتها فالأوراق،
عشان نوقفها فورا.
جلس بالمقعد المقابل، متسائلا في قلق: ليه!
أكدت في جدية: الأدوية دي بتشتغل ع المخ، عشان كده انتبهت إن الولد كان هادي شوية، على غير عادة أولاد التوحد، اللي فالأصل عندهم فرط حركة.
وضعت كفها بشكل لا واعِ على خدها، الذي نال صفعة ساجد المدوية بالأمس، تنبه أيوب لذلك، وسيطر على ابتسامة كادت أن ترتسم على قسماته، وهي تستطرد متسائلة في جدية، وقد انقلب حالها لامرأة عملية بامتياز: دلوقت عايزة أعرف، إيه أكتر حاجات بيحبها ساجد! سواء أكل، ألعاب، موسيقى، كل حاجة حرفيا.
بدأ أيوب في سرد ما يعلمه، فنهضت هي في أريحية، لتجلس خلف مكتبه، ممسكة قلم وإحدى الأوراق البيضاء،
وبدأت في تدوين ما يقوله، حتى إذا ما انتهت، دفعت بالورقة أمام موضع جلوس أيوب، هاتفة في مزاح: الدوا ده تاخده بانتظام، وتجيلي الاستشارة بعد أسبوع، وإن شاء الله بالشفا.
تطلع في عدم فهم لمزحتها، وأخيرا تنبه أنها تجلس خلف مكتبه أشبه بالأطباء، وتضع قائمة طلبات ساجد أمامه