أشار لها أيوب بالجلوس على أحد المقاعد أمامه فنفذت فالتو، ليعاجلها مستفسرا: قولتي إنك حاصلة على ماجستير في التعامل مع الأطفال ذوي الاحتياجات الخاصة!
هزت رأسها في حماس مؤكدة : ايوه يا فندم، وأهي أوراقي، وشهادات الخبرة، وبعض التوصيات، لو حابب تطلع عليها مرة تانية.
أكد أيوب: أنا مش هطلع عليهم، أنا هحتفظ بهم.
أخرجت ملف أوراقها، ومدت كفها بالملف، هاتفة في تحذير: طب خد بالك منهم، دول مكلفني ثروة، مش هعرف
أخرج زيهم تاني إلا بطلوع الروح.
ابتسم سعدون لتلقائيتها، بينما هتف أيوب متوجسا: ليه! هو أنتِ مزوراهم عشان يكلفوكي ثروة!
قهقهت سلمى مؤكدة: لا مش للدرجة دي يا فندم، بس حضرتك عارف بقى الروتين، والإجراءات، والاكراميات، وكل حاجة بحسابها.
هز أيوب رأسه متفهما، وأكد في نزق اعتيادي: تقدري تقولي أيوب بيه، ولو أنتِ جاهزة! يبقى ياللاه عشان تشوفي شغلك، وأعرفك على الولد، اللي هيكون شغلك معاه.
تنحنحت متسائلة في حياء: طب ممكن كباية ماية!
تنحنح أيوب بدوره، معتذرا في لباقة: آه أكيد، معلش أنا مستعجل عشان عندي ميعاد مهم، فمقمتش بواجب الضيافة كما يجب، بس أنتِ خلاص بقيتي من العاملين هنا، هااا.. تشربي إيه!
هتفت مبتسمة في أريحية : طالما بقيت من العاملين وكده، يبقى أطلب فطار بقى وابقوا اخصموه من مرتبي.
امسك سعدون ضحكاته بالكاد، بينما تطلع لها أيوب في تعجب، لتفسر هي في بساطة: أنا واحدة بقالها يومين فالمطار، يعني مكلتش بقالي أكثر من…
وأخذت تحسب على أصابعها كما الأطفال، لتهتف مستطردة: حوالي كده ٥٠ ساعة، ده رقم قياسي يتحط فموسوعة