المرأة الوضاءة، المشعة بالبهجة، والمغلفة بالطهر!
جذب خواطره بعيدا عن هذا المسار الشائك، مقلبا الرواية بكفيه، يسألها: يا ترى الرواية عجبتك! تولستوى كاتب روسي تقيل، وآنا كارنينا، أثارت جدل واسع، أنتِ إيه رأيك في أفعالها! هل من المقبول أن زوجة تقع فالحب! أنتِ لو مكانها هتعملي إيه!
تنهدت سلمى، مجيبة: أنا لو مكانها..هااا.. هحاول أسد كل منافذ الغواية، واستعين بالله، وأقطع أي صلة ممكن توصلني للشخص ده، مهما كانت، ولو جوزي شبه زكي رستم في نهر الحب، هطلب الانفصال، وساعتها يبقى لي الحق فالارتباط بشكل محترم وشرعي، بما يرضي الله، بس سيبك أنت، الأستاذ ذكي رستم، كان عليه واحدة، أنتِ مستهترة يا نوال، توقف المراكب السايرة.
قهقه أيوب، ثم هتف متعجبا: بس غريب إنك جاوبتي عادي كده!
قطبت حاجبيها مستغربة: فيها إيه!
أكد في دهشة: أول مرة في واحدة تجاوب على سؤال زي ده! أصل الاجابة المتوقعة، أنا مش ممكن أكون فمكانها أصلا عشان اجاوب، وتبدأ تتهمها بالفجور، وحاجات تانية كتير، لا داعي لذكرها..
صمتت سلمى لبرهة، هاتفة بصوت متحشرج تأثرا: أنا أبويا الله يرحمه، قالي مرة.. من عاب أخاه بذنب، لم يمت حتى يفعله، فإياك و الشماتة بأخيك، فيعافه الله ويبتليك.. مين فينا منزه عن المعاصي وارتكاب الذنوب، محدش عارف ممكن دنيته توصله لأي طريق، ولا قدره يحطه فاختبار شكله إيه!
همس أيوب مؤكدا: صدقتي، الكل قديس حتى تأتي العاهرة..