-حضرتك عايزة حاجه؟!
سحبت نرمين الكرسي وجلست عليه بتعالي هو جزء لا يتجزء من شخصيتها ووضعت قدم فوق الأخرى وقالت
-عرفيني عن نفسك يا ونس
شعرت ونس بالإندهاش من ذلك السؤال ولكنها قالت بهدوء
– هقول أيه يعني … بنت غلبانه حكمت عليها الظروف أنها تشتغل في البيوت علشان تقدر تجيب علاج أمها وأخواتها يكملوا تعليمهم … وتقدر تجيب ليهم لقمه يكلوها وهدمه يلبسوها
ظلت نرمين صامته تنظر إليها بتفحص … وظلت ونس واقفه تنظر إليها لعدة ثوانِ ثم عادت إلى ما تعمله لتقول نرمين من جديد
-أيوه بس ده ميمنعش إنك كان ممكن تشتغلي شغلانه تانيه غير الخدمة في البيوت
لوت ونس فمها بضيق لكنها رسمت الهدوء من جديد ونظرت إلى نرمين وقالت
-أمي خياطة بريمو بس صحتها مابقتش قد قعدة المكنة …. وأنا مش معايا شهادة علشان أتوظف بيها ما أنا مقدرتش أكمل دراستي … وشغل المحلات ذل ومهانه من أصحاب المحلات شوية ووقفه طول النهار على رجليا