رددت خلفه بصدمه .. ليكمل بنفس الهدوء
-لكن هنا مش قصر الصواف .. هنا مفيش الغرور والتعالي … هنا مفيش التسلط والتجبر .. لازم تبقى عارفه أني مش هقبل منك أي معاملة سيئة ل ونس ومش معنى أن ظروفها حكمت عليها أنها تشتغل في البيوت ده يدينا
الحق أننا ندوس عليها بجزمتنا .. بالعكس إحنا لازم نحترمها ونحترم مجهودها وتعبها ده
ظلت تنظر إليه دون أن تتغير تعابير وجهها لكنها كانت تفكر في كلماته … تعلم أنه محق لكنها وبدون إيرادة منها تشعر بالغضب من تلك الفتاة … تلك الذي أخذت تفكير أخيها حتى أنه لم يهتم لسؤالها عن حالها وماذا فعلت في أمر طارق .. أو حتي يهتم لصحته … جحظت عيونها بصدمة وإدراك حين أكمل كلماته قائلاً
-تخيلي كده يا نرمين لو أنك مش من عيله الصواف .. وكنتِ من عيلة فقيرة .. وعندك أخوات محتاجين أكل وشرب وعلاج .. وأب أو أم تعبانين ومحتاجين علاج … كنت هتعملي أيه؟ .. ولو حكمت عليكي الظروف أنك تشتغلي في البيوت أو عند حد .. تحبي الناس تعاملك إزاي
صمت حتى يترك لها المساحة حتى تفكر في كلماته تدرك معناها جيدًا .. ثم أكمل بعد عدة لحظات
-أنا بس كل إللي طالبه منك إنك تحسي بغيرك .. وتعرفي أن كلنا بشر .. مش علشان هما فقرا يبقوا أقل مننا ..