نهر : لا المستوصف موجود وفيه أهم المتطلبات لكن أوفر بس التخصصات دي الأول..
ريهام : وفين الحكومة يابنتي ماخالك نائب في الحزب خليه يساعدك ..
نهر :ما هو هيساعدني بس لازم أرتب أموري وأنا محتارة مش عارفة إزاي اظبطها …
ريهام : هو دا عيب البلد يجي واحد يتعين نائب علشان يساعد الفقراء يروح ينساهم ويشوف مصالحه …
نهر : الموضوع مش كدا خالي فتح مدرستين لغايه التعليم الثانوي ودخل الكهربا بعد ما كانوا شغالين علي مواتير وميه
بس الناس في الكفر هنا غلبانه جداً وفعلاً محتاجين مستوصف قريب لأن أقرب مستوصف بعيد عن كفرنا دا ب 3
كفور وللأسف زمان الستات كانت الدايه بتولدهم والحالات الصعبة بيودوهم المستشفى اللي في المحافظة وبتاخد وقت علشان يوصلوا وفي حالات كتيرة ماتت
لحد ما أنا اتخرجت من طب واتخصصت نساء وتوليد بدأت أساعدهم وخالي فتحلي عيادة بس في تخصصات
كتيرة مش متاحة…
ريهام : طيب ياحبيبتي أنا هنشر الطلب دا عندي في جروب المستشفى لو في متطوعين وأمري لله هاجي معاهم ..
نهر : ياريت مش عارفة أشكرك إزاي وطبعاً تنوريني …
ريهام :مش عاوزة ألاقي ناموس وحشرات وكدا….
نهر :هههه لا متخافيش الجصر عندينا فيه كل الوجاية الازمة …
ريهام : إنتي لسانك بدأ يتعوج ولا إيه ..