بصتله زهرة بحيرة تقوله إيه سبب عياطها ولا تعمل إيه؟ وبتقول لنفسها إزاي شافها وهى بتعيط مع إنها كانت بعيدة عنه بكتير
قررت تقوله وخلاص: كنت ماشية لوحدي وسط الكليات عشان أطلع من الباب الرئيسي وشوفت كذا ولد واقفين
فالصراحة خوفت لما لقيتهم بيبصوا عليا وكان في ولد منهم معهم قاعد ورايا وطلب مني أغششه بس مارضيتش طبعا عشان حرام حتى لو حليت السؤال غلط
كان بيسمع لها وهو على آخره عايز يسمع إيه اللي حصل بسرعة بس سايبها تكمل على مهلها
بقلم إسراء إبراهيم عبدالله
كملت: فلما لقيته بيبص عليا والباقي بصوا عليا عرفت إنه كان بيتكلم عليا لما شافني فجه في بالي مية سيناريو وماكنش في حد دلوقتي ماشي والباقي لإما روح أو لسه في الامتحان ماكنتش عارفه أعمل إيه
روحت معدية بسرعة من قدام عينهم وبعد دقيقة لقيت حد بيشدني من دراعي وأنا كنت خايفة جدا وماصدقت شوفت البوابة عشان أطلع المهم صرخت وخوفت ليكونوا لحقوني بس الحمد لله طلعت صاحبتي منى
بس أعصابي كانت سايبة من الموقف والتخيلات فعيطت بقى وكدا وهى حضنتني لما شافت حالتي وحكيت ليها