_يعنى ايه اتجوز مرات اخويا؟، انت سامع نفسك بتقول ايه يا بابا!!
= انا سامع نفسى كويس، مرات اخوك لسه صغيره والعين عليها، وغير كده هى حامل ف حفيدى او حفيدتى وانا
مش هسمح ان حد تانى يربيه او يتربى بره العيله.
_ اه، تقوم تجوزهالى انا اللى متجوز ، واكبر منها ب حوالى 11سنين صح!، وبعدين يا حج كلنا عارفين بقصه الحب اللى كانت بين موج وادهم، واهو ادهم متوفى ليه 3 شهور دلوقتى وموج حامل ف الشهر الخامس، وكلنا عارفين
برضو هما حابين البيبى ده ازاى، وازاى موج روحها ف البيبى اللى هييجى واللى هيعوضها عن غياب ادهم.، انا بحب
مراتى يا بابا، مستحيل اجرحها بالطريقه دى
= يا بنى افهمنى انا رايدلك الصالح
_ انهى صالح ده يا حج؟ ، كلنا عارفين موج كانت بتعشق ادهم الله يرحمه ازاى، عايزنى اجى اقولها انا هتجوزك
واخد مكانة ادهم عندك؟!
ابوه: ومين قال كده، احنا بس هنحافظ عليها يابنى وعلى اللى ف بطنها، اسمع كلامى يا ياسين احنا عايزين نحافظ عليها هى واللى ف بطنها
ياسين: فرضا انى وافقت كده كده مينفعش نتجوز قبل م تولد، لانها ف شهور العده، دى حاجه الحاجه التانيه بقى هى مش هتوافق وانا واثق من كده،ومراتى يا حج مش هيهون عليا اكسرها،انا روحى فيها
ابوه: يا سيدى وافق انت ومتشيلش هم موج، ولو على مراتك ف هى عاقله واكيد هتفهم احنا مالنا
ياسين: سيبنى افكر يا حج الامر مش هين زى م انت متصور، ادهم الله يرحمه كان ابنى قبل م يبقى اخويا.