ليكمل بجدية موجهها حديثه لغزل:
– غزل الدكتور جاي يكشف على يوسف ومحمد عايزك بره.
كادت أن تتحرك لتجد كفه يمنعها ويقول:
– ما الدكتور يجي وهي موجودة ايه المشكلة؟
ليفرك يامن جبينه محاولًا التبرير ليقول:
– عشان كمان الدكتور هيمر على غزل.. متنساش انها تحت الملاحظة زيك.
– خلاص خليهم ينقلوها معايا في نفس الاوضة.. كدة هبقى مطمن اكتر.
………..
– ساكت ليه؟ ناوي على إيه يا يوسف.
قالها يامن وهو جالس بجواره فوق كرسي بجوار فراشه.
يغمض عينيه بضعف يحارب الدموع الحارقة لعينيه يجب عليه التماسك.. يجب عليه التفكير في مستقبله.. لا، بل مستقبلهما معًا.
وعندما طال صمته مال إليه يامن يمسك كفه قائلا بإصرار:
– رد عليا.. عشان نشوف حل في المشكلة دي.
ليفتح عينيه ينظر له بجمود يقول من بين أسنانه:
– عايزني اروح اقولها ايه؟ ها فهمني؟ اقولها سوري ياغزل مش هنتجوز عشان اكتشفت أني مش بخلف؟
ثم يكمل بصراخ:
– الدكتور ده مش بيفهم.. مش يمكن غلطان.
يامن بحدة غريبة:
– ماتلفش وتدور يايوسف.. غزل لازم تعرف ده حقها وبعدها هي اللي تقرر تكمل ولالا.
– مقدرش.. مقدرش إزاي عايزني اقولها حاجة زي دي ونفرض عرفت واختارت تبعد اعمل ايه بعدها؟ تقدر تقولي.