لقد أتى.. لقد أتى “سيف” كما وعدها ليطلب يدها للزواج، إنه هنا هو و والديه ؛
وصلت عند باب غرفتها و ورابته قليلًا، أطلّت برأسها لا لترى، إنما لتسمع بوضوحٍ، و ما لبث أن برز صوت عمتها “راجية” مغتبطًا :
-إيه رأيك يا أمينة بقى في المفاجأة دي.. حسن جوزي نزل من الطيارة عليكوا علطول حتى ماطلعش شقتنا
ردت “أمينة” بترحيب :
-ألف حمدلله على السلامة يا أستاذ حسن. نوّرت بيتك و مصر كلها
شكرها الأخير :
-الله يخليكي يا أم أدهم. ده نوركم و الله. و بالأخص نوّارة البيت كله إيمان.. أمال هي فين صحيح ؟
-حالًا أدخل أجيبها لك
-يا ريت لغاية ما أتكلم أنا و أدهم شوية. إذا عندك وقت يا دكتور !
جاء جواب “أدهم” مهذبًا واثقًا :
-و لو ماعنديش أفضى لك يا عمي
-حبيبي تسلم
-اتفضلوا اقعدوا طيب …
في هذه الأثناء ذهبت “أمينة” لغرفة ابنتها، لتجدها تقف بوجهها هكذا، دلفت و أغلقت الباب ورائها و هي تقول مدققة النظر بملامحها الناعسة :
-إيه يا إيمان ده. إنتي لسا قايمة من النوم.. إنتي مش عارفة إن عمتك و جوزها جايين عشانك. مش إنتي إللي قلت لي كده إمبارح !؟؟
جاوبتها “إيمان” بتعبٍ واضح :
-أيوة يا ماما. أنا عارفة إنهم جايين زي ما قلت لك.. بس كنت سهرانة شوية من إمبارح. دلوقتي أدخل أغسل وشي و ألبس و هاطلع لهم
حثتها “أمينة” بعجالةٍ :