-اتفضل يابني في انتظارك
مشى “أدهم” صوب الشرفة يتبعه “مراد” و نظرات “إيمان” الوجلة في إثرهما، تسارعت خفقات قلبها بجنونٍ و هي تستوعب ما يجري، و لا يمكنها حتى تخيّل على ماذا ينوي ذاك المجنون، نهايته حتمًا على يديه !!!
*****
-ها يا سيدي. أدينا على إنفراد.. ممكن أفهم بقى إيه الضروري إللي خلّاك تقوّمني من كتب الكتاب بالشكل ده !؟
وقف “مراد” قبالة “أدهم” متوترًا بشدة، كان يرتب كلماته عبثًا، فهو لا يعرف كيف يصوّغ له كل هذا.. إلا أنه عمل
جاهدًا و باسراعٍ …
-هو أنا جايز اتأخرت كتير. جايز غلط إللي بعمله.. بس عشان أكون على الأقل مرتاح إني ماكنتش جبان. تيجي مني دلوقتي في آخر لحظة. أحسن لو ماجتش خالص …
حدجه “أدهم” بتعبيرٍ مستغرب، فضغط الأخير فكيه بشدة مدركًا عواقب ما سيتفوّه به، لكنه أردف بشجاعةٍ لأول مرة في سبيلها :
-أنا بطلب منك إيد إيمان يا أدهم.. بطلب منك تلغي الجواز ده و تحط إيدك في إيدي أنا !
رمقه “أدهم” مدهوشًا، و صمت للحظاتٍ طويلة… ثم قال بهدوء :
-مراد.. انت بتقول إيه؟ إنهاردة كتب كتاب أختي. و انت جاي تطلبها مني ! .. و استطرد بذهولٍ أشدّ :
-أنا مش فاهم إيه الحكاية !!!
أفصح “مراد” بلا ترددٍ و بكثيرٍ من الانفعال :
-الحكاية إن انا و إيمان بنحب بعض. من زمان.عمرها الجرأة ما جات لي أقول لك الكلام ده بس خلاص مش قادر. لتاني مرة بتضيع مني.. أنا بحبها يا أدهم !
رجع “أدهم” للخلف قليلًا في صدمة :
-إيه !!؟
أومأ “مراد” بقوة و اعتمد القليل من الكذب تاليًا :
-زي ما سمعت. من و احنا عيال لحد ما وصلنا المدرسة و بعدها كمان. لحد ما سافرت و كنت مفكر إني أقدر انساها أو حياتي تشغلني عنها و إنها مجرد حب طفولة.. لكن دي مش الحقيقة. لا ليا و ليها. إحنا لسا بنحب بعض. أنا و هي عارفين كده بس إللي بيحصل إنهاردة أكبر غلط. إيمان مش بتحب مالك. إيمان بتحبني أنا بس ماعندهاش
الشجاعة توافق على ده !
ظل “أدهم” صامتًا للحظات، و هو يحدق إليه بنظراتٍ جامدة، بدا و كأنه يتعرّف إليه لأول مرة …
توقّع “مراد” أن يرى الغضب أو ربما العنف في عينيه، لكنه أخيرًا.. لم يجد فيهما سوى… الجرح !
هل كان من المفترض أن ينتظر منه جواب، حسنًا.. لم يحصل منه و لو على كلمةً
فجأة استدار “أدهم” و مضى نحو الداخل مرةً أخرى …
*****