-يلا قومي هانروح المستشفى ! .. شدّ يدها بحزمٍ أجفلها
لو أراد لأقتلعها من الفراش بسهولةٍ، لكنه إنصاع لقبضة يدها التي شددت على كفّه فسكن على الفور منصتًا إليها :
-استنى بس يا أدهم. مستشفى إيه. مش مستاهلة
تململ بغضبٍ : مش مستاهلة إزاي. انت بقالك فترة تعبانة و صدرك تاعبك. بس إنهاردة زادت أوي الحكاية ! .. ثم هتف بصرامةٍ :
-إستحالة أقف اتفرج عليكي. مش هاسمع كلامك المرة دي. يلا قومي بقولك هانروح المستشفى !!
*****
-Asthma Syndrome !
أعلن الطبيب الخمسيني تشخيص حالة مريضته بعد الكشف الدقيق عليها
كانا كلا الزوجين يجلسان أمامه، و قد كانت “سلاف” رافعة نقابها لعجزها عن التنفس بشكلٍ طبيعي، لم تكن تفهم ما أدلى به.. و لكنها أيقنت من وجه “أدهم” بأنها علّة غير حميدة على الإطلاق …
-انت متأكد يا دكتور !؟ .. تساءل “أدهم” محاولًا إخفاء صدمته قدر المستطاع
-ربو ؟ متأكد !؟؟؟
شحب وجه “سلاف” فوق شحوبه و هي تستمع إلى هذا الخبر يخرج من فم زوجها، جمدت تمامًا و لم تستطع نطقًا.. أحسّ بها “أدهم” و ألقى عليها نظرة
كما العاجز، كالغريق الذي يتعلّق بقشة مد يده و قبض بقوةٍ على كفّها الملقى بحجرها و هو يعاود النظر إلى الطبيب قائلًا بانفعالٍ :
-ممكن تتأكد تاني يا دكتور. ممكن نعمل تحاليل آشعة أي حاجة. إزاي شخّصت بالسرعة دي !!؟
إنبلجت ابتسامة على وجه الطبيب، و قال مهدئًا و هو يخلع نظارته :
-بالراحة يا دكتور أدهم. مالك بس أنا لسا ماكملتش كلامي.. أكيد هانعمل تحاليل و أشعة. بس أنا متأكد كمان من إللي بقوله. و في نفس الوقت بطمنكوا. الوضع مش خطير. النوع ده من الربو تافه جدًا. عامل زي الحساسية
المزمنة كده. هانحدد له علاج إن شاء الله بعد ما تطلع نتايج التحاليل. ماتقلقش المدام زي الفل و الله
كان يتنفس بثقلٍ و هو لا يزال يشعر بإعياء الخوف عليها، ازدرد ريقه ضامًا يدها بقبضته أكثر …
-أدهم يابني انت بتثق فيا و لا لأ !؟ .. حدثه الطبيب بجدية
أدهم عابسًا بوهنٍ شديد :
-أكيد يا دكتور أمجد !
الطبيب بحزمٍ : خلاص يبقى تصدقني و ماشوفش وش القلق ده عليك ! .. و حوّل ناظريه نحو “سلاف” مكملًا :
-و إنتي يابنتي. ماتخافيش إنتي كويسة.. ممكن اسألك سؤال ؟
بالكاد خرج صوت “سلاف” هامسًا أبحًا :
-اتفضل !