_ وماله ولو رايده كمان يعيشوا معانا أهنه معنديش مانع.
بس وجتها متحزنيش لو چات واحدة واخدت منك جاسر وجالت أمها مجدرش أعيش وهي بعيد عني.
تنهدت بضيق وردت بنفور
_ اعمل ايه بس، أول مره تبات بعيد عني وجلجانه جوي عليها.
أحاطها بذراعيه ليقربها إليه ويطبع قبله حانيه على جبينها
_ متحلجيش ليلى ميتخافش عليها واصل
تحولت نظراته إلى مكر وهو يقول
_ بجالك سبوعين جلباها علينا نكد ونسيتي جمال وشاغله نفسك بولاده ينفع إكده؟
ابتسمت مرغمه وهى تتطلع إليه بحب لم يقل يومًا بل يزداد يومًا بعد يوم
_ لازمن اشغل نفسي بيهم لأنهم حته منيك كل واحد فيهم واخد منيك حاچه وكلهم على بعضيهم إكده بيكملوا جمال تاني
عقد حاجبيه متسائلًا
_ عايزة تجولي إني جاسر فيه حاچه واحدة مني؟
ده في الشكل منصور أخوى، وفي الطبع جده عمران واخد أيه مني؟
ردت بحب وهى تملي عينيها من ملامحه العاشقة لتفصيلها
_ واخد منك حنيتك وحبك للي حواليك وقلبك الأبيض، صحيح هو حمجي حبتين ومش بيعرف بين عواطفه بس حنية الدنيا كلها فيه