-هاتولى البت دى بسرعة
اول ما سمعت الظابط حسام بيقول كده لعساكره طلعت اجرى لما قطعت النفس وهما مسكونى واخدونى ع القسم
حسام: انتى مفكرة انك لما تروحى ع بلد تانية مش هعرف اجيبك يا بت
………….: ابوس ايدك يا حسام بيه انا قولتلك مش هعرف اشتغل معاك مرشدة انا عايزة اعيش حياتى كفاية سنين من عمرى عدت قضيتهم فى الملجأ
حسام: ولو مسمعتيش كلامى هلبسك قضية يا صفا تعيشى بيها بقيت حياتك فى السجن وده سهل عليا
غلبتنى دموعى للاسف انا مليش اهل احتمى فيهم ولا ليا حد ارجعله يخلصنى منه قعدت اعيط لقيته قعد قصادى واتكلم باسلوبه المستفز
حسام: صدقينى يا صفا لو سمعتى كلامى هتبقى تحت حمايتى وانتى فاهمة يعنى ايه تحت حماية ظابط وهتاخدى فلوس محترمة
تغنيكى عن بيع الورد والمناديل فى الاشارات وكمان هتبقى زى الابطال اللى اتكتب اسمهم فى كتب التاريخ امثال رأفت الهجان
صفا: والنبى يا حسام باشا بلاش كلام السيما ده وقولى عاوز منى ايه ؟!
حسام بارتياح: كده تعجبينى هبعت اجيبلك اكل وعصير شكلك جعانة تخلصى اكلك واشرحلك مهمتك
قام حسام وساب صفا تنعى حظها اللى وقعها فيه وبعد ما اكلت لانها كانت فعلا جعانة اتكلم حسام
حسام: تسمعى عن الصقر يا صفا !
صفا : طبعا يا باشا هو مين فى مصر ميعرفوش ده زعيم مافيا وبيتاجر فى كل الممنوعات
حسام: جدعة هو ده مهمتك بقى يا بطلة انك تعرفى مين هو الصقر وازاى الصفقات بتاعته بتم وفين ومع مين ومواعيد دخولها البلد
صفا برعب وقامت وقفت بسرعة: انت بتقول ايه يا باشا انا هعرف الصقر ازاى إذا كان الحكومة نفسها متعرفش شكله ايه وبعدين ده واحد القتل عنده زى صباح الخير يعنى لو عرف انى بشتغل معاك محدش هيعرف طريق قبرى فين
حسام: طول ما انتى بتشتغلى بدماغى انا مش بتفكيرك انتى مش هتقعى ولا يكشفك
صفا بخوف: طب يا باشا هتشغلنى عنده ازاى وانتم متعرفهوش اصلا
حسام شغل اللاب توب ع قصر كبير وقال: ده قصر ملك لشخص اسمه محمد الضو وده العضو الاكبر فى العيلة عنده اربع ولاد احمد ومحمود ومصطفى وطه وبنت وحيدة اسمها ندى ولاده اتجوزوا مصطفى وطه وندى عايشين فى امريكا اما احمد ومحمود هنا واحمد عنده ولدين خالد وضياء اما محمود عنده ولد اسمه عمر