ابتسم خالها وقال لها طبعا يا حبيبتي
رد منير وقال: واضح ان انت بتراعي الارض كان عندها حق اختك تستأمنك على الارض دي
ضحك. ايمن وطلب من عامل عنده يجيبله كراسي كان عنده مكتب كدة مبني في وسط الارض دخلنا معاه وطلع دفاتر حسابات وكل مايخص الأرض وطلب من
منير يقراها ويراجعها
منير: دة مال بناتي انا مليش دعوة
حلا: بعد اذنك يابابا انت مسئول عننا بكل حاجة وخالي عاوزنا نتطمن ونعرف كل حاجة ودة مش عيب انا مش مخونة خالي ابدا والي وصت بيه امي انا موافقه عليه وبشهادتك يابابا خالي انسان محترم والعيلة كلها سمعتها
سبقاها
ايمن: ربنا يكرمك ماشاء الله على تربيتك
منير بصلها بفخر وقال: حاضر ياحلا
وبدأ يراجع مع ايمن كل حاجة وبالنهاية قال: كله تمام
حلا: بس انا ليا طلب صغير ياخالي
ايمن: اتفضلي يابنت الغالية
حلا: انت على حسب ماسمعتكم بتاخد راتب ونسبة من الربح واحنا بناخد الباقي صح
ايمن: اه
حلا: هانزود نسبتك ومرتبك كل سنة انت تستاهل كل خير وان شاء الله هادخل كلية زراعة واساعدك
ايمن: كتير كدة عليا انا راضي ياحلا ياحبيبتي
منير: دة اقل واجب ياللا قومو يابنات
خالكم هايفرجكم عالارض
اخدهم ايمن يفرجهم على الارض ويعرفهم بالعمال كان حنين جدا ومحترم وكل الناس بتحبه
وروحنا معاه استقبلتنا مراته وكانت عامله بط واكل كتير جميل
وفضلت تحكي معانا وقالتلنا: امكم كانت اميرة طول عمرها ماشفتش منها الا صلاة ودعاء
ايمن: الله يرحمها ويغفر لها
الكل اترحم عليها
ايمن: ان شاء الله بكرة اعمامي واولادهم عازمينكم عالغدا في بيت عمي الكبير محرم ودة عمدة البلد هناعشان يتعرفو بيكم
منير: باذن الله
حبيبة: عم ماما عمدة زي الي بييجوا بالتلفزيون كدة
الكل ضحك ومنير قال: بكرة تشوفيه شبه الكبير اوي