_ ايوا يعنى انتوا خاطفنى هتعملوا بيا اى افهم بس ؟!
كنت قاعدة فى عربية كبيرة لونها اسود بصلى واحد منهم وقال بزعيق :
_ انتى مبتعرفيش تسكتى من ساعة ما ركبناكى العربية وانتى نازلة رغى رغى ، قولتلك هتعرفى كل حاجة أما تقابلى الكبير بتاعنا .
قولت وانا باكل الساندوتش اللى كان معايا :
_ انا معرفش ي خويا انت معصب نفسك لى وانت شبه حسين فهمى كدا ، ما تخليك زى صاحبك اللى سايق العربية ده شوفت هادى وجميل ازاى .
صاحبه بصلى بأبتسامة لطيفة وقال :
_ تسلميلى ي قمراية انا فعلاً أسمى هادى
ضحكت ليه وقولت :
_ اسم على مسمى سبحان الله
مديت ايدى ليه بالاكل وقولتله :
_ تاكل
اتكلم وهو بيسوق :
_ شكراً ي قمر لسة واكل
كان بيبصلنا التانى وعنيه بتطلع شرار اتكلم وهو بيحاول يكتم غيظه وقال :
_ هادى احنا خاطفينها ي حبيبى مش رايحين نفسحها اتلم شوية
اتكلم هادى وهو بيبتسم :
_ والله دى شكلها لطيف ي لؤى
اول ما سمعت الاسم ضحكت وقولت :
_ كمان اسمك لؤى والله ما باين عليك
بصلى وقال :
_ وحيات ربنا انا لولا الكبير عاوزك حية لكنت قتلتك وارتحت منك
بصيت بطفولية وقولت :
_ شوفت ي هادى صاحبك عاوز يقتلنى يرضيك
اتكلم وهو بيبصلى :
_ ملكيش دعوة بيه هو كدا غلس اتكلمى معايا أنا بس .