– وهو أنا باين عليا أوي كده يعني..؟!
” سـلـمـىٰ ” بتأكيد وهي تحاول كتم ضحكاتها.
– جدًا يعني ههه..!
ثم أضافت بفضول وهي تكتم بيديها فمها بسعادة طفولية.
– هااااا بقاااا قوليلي هببتي إيه يا آخره صبري أنتي..؟!
فإعتدلت ” مـريـم ” في جلستها ومن ثم أخذت تسرد عليها كل ما حدث معها منذ أن دلفت إلى ذلك المطعم
ومقابلتها بذلك الوغد كما لقبته حتى توقيعها للعقد ورحيلها من أمامه والآخرىٰ تسمع لها بإهتمام كبير إلى أن أنهت حديثها فهتفت لها ” سـلـمـىٰ ” بإستفهام.
– وأنتي زيّ الهبلة مضيتي العقد على طول من غير ما تقريّه..
يا بنتي ده أنتي لو عيل صغير لازم بيشوف الورقة ويبص فيها كويس قبل ما يكتب فيها كلمة..
تفرضي حب ينتقم منك ويردلك اللي أنتي عملتيه فيه يقوم حاطط شروط تعجيزيه في العقد عشان يمرمطك براحته ويرد كرامته اللي أنتي بعزقتيها..
” مـريـم ” بخوف واضح على كل تقاسيمها.
– أنتي بتخوفيني ليه يا بنتي مستر زيـاد بعتلي الـ Contrato أمبارح وبصيت فيه كويس وبعته لأونكل مـدحـت يشوفه وقالي تمام كل حاجة تمام..
لازم تقلقيني أنتي دلوقتي وتخليني أفكر في الموضوع وأنتي عارفة أن دماغي بتسحلني في التفكير..
” سـلـمـىٰ ” وهي تنهر الأخيرة بقلق.
– يا بنتي حتى لو قريتي العقد ميت مرة لازم تبصي عليه بصه أخيرة قبل التوقيع..
أنتي بجد غريبة يا مـريـم وبتعملي حاجات مفيش طفل صغير يعملها..
” مـريـم ” بقلق أكبر.
– خلاص أنا هطلب بكرا من مستر زيـاد أني أراجع العقد وأبص عليه بصه عشان أطمن..