عاصي قعد علي الكنبه اللي بره والجرح اللي في ضهره اتفتح
عاصي : (وهو مغمض عنيه وبيتألم ) انا .. انا .. كويس
بدور لفت ورا ضهره لاقت ضهره بيجيب د”م
بدور : خليك هنا ما تتحركش .. ( وهي بتبعد خطوات ) انا جايه حالا
بدور دخلت بسرعه جابت الشاش والقطن عشان تغيرله علي الجرح وبقت تعمل اللي الدكتور قالها عليه بالظبط
بدور : ( وهي ماسكه الحاجه وكانت ورا ضهر عاصي ) ممكن ما تتحركش خالص
عاصي : ( ابتسم ) بقيتي دكتوره دلوقتي
بدور : ( وهي بتنضفله الجرح ) انت بتتريق .. طيب ايه رايك بقي اني كان فعلا حلم عمرى اني اطلع دكتوره
عاصي : ومطلعتيش ليه ؟
بدور : عشان الاحلام ما بتتحققش للي زينا
عاصي : للي زيكم يعني ايه ؟
بدور : يعني اللي مالهمش اهل ياعاصي .. اللي زينا مالهمش حق حتي يحلموا .. كل حلمهم انهم يعيشوا اليوم بيومه
مش اكتر وان اليوم يعدي علينا من غير مشاكل
عاصي : للدرجه دي عيشتي حياه صعبه
بدور : ولسه بعيشها وهفضل اعيشها طول عمرى