علشان متقوليش اعملى سلطة
تحدثت ونس بخفوت و تعب : معلش يا عائش أنا مش فى البيت
أستغربت عائشة و قالت بهدوء : مال صوتك يا ونس و روحتى فين ده باقى على المغرب بتاع ساعتين
قالت ونس بدموع : بابا تعب اوى و روحناله المستشفى الدكتور بيقول ان عنده جلطة فى القلب
أنا خايفة يا عائش
قالتها وهى ترتجف و تشهق رغمًا عنها
قالت عائشة بسرعة و حزن : أنا هجيلك أنتِ فى مستشفى ايه ؟
قالت ونس برفض : لا متجيش أنا كويسة
قالت عائشة بإصرار : أنا هجيلك قوليلى أسم المستشفى يا ونس اخلصى
أخبرتها بأسم المستشفى و أغلقت معها وهى تتنهد بتعب
_____________________________
خرجت عائشة بسرعة من غرفتها وهى تقول : ماما انا هروح لونس المستشفى باباها تعب وهى خايفة
نظرت لها والدتها بتعجب و تردد : بس يا حبيبتى ده المغرب قرب يأذن و مينفعش تروحى كده و أنتِ صايمة
نظرت لها عائشة بعتاب و قالت :مينفعش اسيبها لوحدها يا ماما
قالت والدتها بهدوء : استنى بعد المغرب و خدى زيد و روحى
قالت عائشة برفض : لا يا ماما هروح دلوقتى
_ عائش أنا خلاص قولت بعد المغرب يبقى بعد المغرب
دخلت عائش المطبخ وهى تقول : طب هعملها أكل علشان تأكله هى و مامتها و أختها اكيد مش هيفطروا ولا دى مينفعش كمان