بس مش خابرة حاسه ان شخصيته دى كانت بسبب چدى وچدتى الله يرحمهم .
لأن هما اللى ربوه على الكره والحقد والتفرقة بينه وبين خالى منصور .
تعجبت زهيرة بقولها …كيف ده !
يعنى هما اللى جاللوه اطلع واد ليل وحرامى وكتال كتلة .
كيف يعنى يطلع واحد حرامى وواحد ظابط !!
زاد بتروى …عفهمك يا مرت خالى .
أول شىء العقول دى بتاعة ربنا سبحانه وتعالى ، يعنى مش ذنبه خالى ممدوح أنه كان عقله على جده وكان عيسقط وملهوش فى التعليم ، لكن خالى منصور الله يرحمه كان ذكى وعيطلع الأول ديما كيف ما جولتى .
وده خلى چدى يحب خالى منصور ويعاقب خالى ممدوح ومن هنا حوصلت التفرقة بناتهم وكرهه خالى ممدوح لانه شايف أن أبوه مش
عيحبه كيف منصور .
وده كان جدى غلطان فيها صوح ، لأن فى الاخر التنين عياله .
وبالعكس كان خالى ممدوح عايز إهتمام اكتر عشان يقدر يمشى شوية فى التعليم .
لكن اللى حوصل العكس وخرجه جدى من المدرسة خالص وهنا أتصاحب مع صحبة السوء .
وبرده جدى معرفش يعمل حاچة وسابه ليهم لغاية ما وصلت به الأمر للحصل.
يعنى الشاهد يا مرت خالى أن خالى ممدوح ظالم ومظلوم فى نفس الوقت ، فهمانى ؟
أومئت زهيرة برأسها مردفة …عنديكى حق ، بس مش كل اللى أبوه وأمه عيفرقوا بينه وبين أخواته عيعمل أكده برده .
مش توصل للكتل ولى بيعمله ممدوح ده .
ده شيطان يا بتى صدجينى .