-فهمتك يا مرات عمي متقلقيش هي مسألة وقت هضبط أموري عشان أسافر وهطلق أنا وعز.
بعدين سيبتها ومشيت وانا مش بلومها… بس برضه قلبي وجعني.
……
-منورين والله يا جماعة
قالها عم حسن وهو مبتسم… ابتسم جمال أبو العريس
-ده نورك يا أبو عز…. اومال فين عروستنا.
-جاية دلوقتي.
كنت ماشية ورا آلاء اللي شايلة صينية القهوة وهي حاطة وشها في الأرض… فجأة اتجمد مكاني وبسرعة هربت ودخلت اوضتي…. قعدت علي السرير وأنا بترعش…. دموعي كانت بتنزل لوحدها… دخل عز وقال:
-إيمان مالك!
مردتش عليه.
قرب مني وحاول يلمسني… زقيته وانا بصرخ وبترعش
-إيمان فيه ايه أنا زعلتك