شاطرة اوووي الناس كلها بتتكلم عنها وعن رأفتها بالطلاب …الطلاب كانوا بيعتبروها اختهم الكبيرة وبيحبوها اووي …حتي امها بطلت تضغط عليها في حكاية الجواز دي وسابتها براحتها حتي أنا مفكرتش أبين مشاعري كان خوف أنها ترف*ضني وتفتكر اني هاخدها
بديل لماهي …أنا فضلت من بعيد اساعد وأشوف محتاجة ايه …كنت مستني اي لمحة منها أنها بتحبني عشان اروح واطلبها المرة دي بالطريقة الصحيحة …بس الوقت طال …فضلت سنتين مستني اي تلميح منها بس هي كانت ج*بلة ما شاء الله ….
في يوم …
روحت بعربيتي الجديدة قدام السنتر بتاعها كنت مبسوط اني قدرت اخيرا اشتري عربية …صحيح هي نص عمر وبالتقسيط وواخده نص مرتبي من المستشفي اللي بشتغل فيها بس اهي عربية احسن من بلاش …
كنت مستنيها تطلع من السنتر عشان أوصلها زي كل يوم …
-ازيك يا أمير
قالتها كاميليا وهي بتبتسم…
-اهلا يا كامي…
قولتها بإختصار وبعدين مشينا ….