العيد اتفاجئنا ان الشيخ رضوان. جاي يزورنا
وقعد مع بابا وكعادة سميحة اختي ووقفت جنب علشان تتصنت كعادتها كانت تسليتها الوحيدة ما هو ما فيش لا راديو ولا تليفزيون. قلت لها على فكرة كده حرام. وماما لو شافتك هتبهدلك وتطين عيشتك
قالت لي يا ستي اسكتي ده بيتكلموا عننا. قلت لها بيتكلموا عننا ازاي ؟ قالت لي الشيخ رضوان شكله جاي يخطبنا لولاده. الله يا نادية اخيرا هنتجوز ونمشي من البيت ده. قلت لها ابعدي عن الباب بدل ما ماما تشوفك
واتبهدلت. وبعد ما مشي الشيخ رضوان
نده علينا بابا وقال لنا تعالوا يا بنات عندي خبر حلو لكم. الشيخ رضوان جه النهاردة علشان يخطبكم لولاده وانا وافقت انا شايف ان ما فيش مانع ابدا. الولدين كويسين وملتزمين وزي الفل
هل واحدة فيكم عندها مانع؟ ردت سميحة بسرعة وقالت لأ يا بابا ما عندناش مانع ولا حاجة خلاص يا بنات الف مبروك انا كده كده اتفقت مع الشيخ هيجي بكرة ويجيب ولاده الاتنين علشان تتم الرؤية الشرعية