طول الوقت كان بيشرح وانا وهبة مش معاه خالص بس مركزين بجمال امه المش طبيعي ده ، فضلت ابصله كتير وهو يبصلي و يبتسم
بعد شوية هبة استأذنت تروح الحمام
سعيد قرب مني شوية وقال : انتي ما بتتكلميش ليه
قولت بخجل : اتكلم اقول ايه
مسك خصلة من شعري رجعها لورا و قال : اي حاجة ، سمعيني صوتك الحلو ده
انا كنت دايبة بكلامه حرفيا و اعجابي بيه بيزيد
مرت ايام و اسابيع و انا طول الوقت بفكر فيه و بتفاصيله و ازاي هو حد حنون و رومانسي ، علاقتنا بقت قوية بشكل ملحوظ
بعد فترة اكتشفت ان الناس بقت تتكلم عليا و بقولو احنا بنبعت البنات تتعلم ولا تحب
اتاريها هبة مش سايبة حتة الا واتكلمت عليا فيها
حسيت الدنيا اسودت بوشي ، روحت لسعيد و فهمته سبب زعلي
سعيد : انتي هتسمعي للناس يا ندى