في النهاية نمت, نمت من الارهاق والتعب, وفي نومي كنت شايف نفسي في ارض ملتهبة, كأنك جمب فوهة بركان ثاير, نار عمالة تتطاير حوليا والمكان كله سخن, الأرض نفسها عليها حمم بركانية والنار كأنها بتجري ورايا انا مخصوص..
Thank you for reading this post, don't forget to subscribe!صحيت بعد ما حسيت ان جسمي اشتعل باللهب وبدأ يتحرق بالفعل, كنت تقريبا عايم في بحيرة من العرق وقلبي بيدق زي المدفع, ريقي ناشف زي الأرض الصحراوية وجسمي كله منمل..
ومن وقتها بدأ يلازمني احساس الحرارة اللي في ضهري دي, كأن فيه فرن مولع فوق كتفي, مبقتش عارف اعمل ايه, هروح لدكتور ولا لشيخ ولا ممكن يكون حصل ايه أصلا..
واستمرت الكوابيس الغريبة دي كلها, وكلها بتصب ناحية النار, مرة بركان, مرة الاقي نفسي بغرق في رمال سخنة في الصحرا, مرة اتحرق في قلب الشمس, مرة السما تمطر حمم بركانية.. وهكذا..
بعد ايام كلمتني خطيبتي وحست من صوتي اني تعبان, وصممت اننا نتقابل عشان تعرف مالي, وبالفعل اتقابلنا في كافيه بعد ما استأذنت والدها, كانت حالتي فعلا صعبة, بحك جسمي بطريقة غريبة وعنيا شاردة وتحتها اسود من قلة النوم..