بعد ما اتجوزت يا بنتي عمك اتجوز بتلت شهور, وبقيت انا ومرات عمك في البيت بنتسابق على مين تحمل الأول, وكان المفروض انا اللي أحمل بس ده محصلش, وهي اللي حملت قبلي, حاولت مرة واتنين بس ده محصلش وكنت بشوف بطنها بتكبر يوم بعد يوم وبتاخد الاهتمام كله في البيت, شيطاني يا بنتي خلاني وهي نازلة مرة من على السطح بدقيق الخبيز اني أحطلها حاجة عشان تتزحلق وتقع من على السلم, وفعلا وقعت وأجهضت والدكتور قال انها مش هتحمل تاني أبدا خلاص بعد الاجهاض ده..
Thank you for reading this post, don't forget to subscribe!كنت فرحانة انها كدا مش هتاخد مكاني أبدا, وفرحت أكتر لما حملت, بس الحمل سقط مني مرة واتنين وتلاتة, لحد ما أبوكي حلف لهيطلقني لو ده حصل مرة تانية, وحملت فيكي, ومن رعبي جريت على واحد دجال وطلبت منه يساعدني, قالي انه هيرسم طلاسم على بطني تحمي الجنين, وهيحط حارس عليكي يحميكي دايما..
وفعلا يا بنتي حفر الطلاسم على بطني, وقال إن الحارس وجوده بقا مرتبط بنبضات بطني, يعني طول ما انا حية الحارس موجود, بس لما كبرتي الحارس طلع عاوز يدمر حياتك كلها, خلاكي تعيشي في بؤس طول عمرك, وكان عاوزك دايما عند نفس المقبرة اللي دفنت فيها السحر, عاوز يتجوزك لأنه بيحبك..
حاولت معاه من يومين انه يسيبك في حالك لأنه كان بيظهرلي ومعيشني طول السنين دي في رعب لدرجة إن أبوكي هرب من البيت بسببي بس هددني انه هيخليني أموت خالص, ودلوقتي انا فعلا بموت واستحق اللي انا فيه ده يا بنتي, وكل اللي بطلبه منك تسامحيني, وتطلبي من مرات عمك تسامحني..
وماتت أمي, ماتت بين ايديا وروحت انا بعدها أعيش مع جدتي في بلد تانية بعد ما أهل البلد قالوا إني مجنونة ومتحاسبتش على قـtـل أمي, وفعلا اختفت كل حاجة لأن السحر كان مرتبط بنبضات بطن أمي, وطالما هي ماتت فالسحر انتهى, ورغم إني بدعيلها وقربت من ربنا بس كان لازم أحكي الحكاية, أحكيها عشان الناس تفهم انك استحالة تأذي حد والموضوع يعدي, والله ولو بعد 100 سنة لازم هتدوق من نفس الكاس, حاجة تعلمنا اننا نهرب من ايذاء الناس زي ما بنهرب من النار, وإلا هنشوف الجحيم على الأرض وفي الآخرة..
“وَالَّذِينَ يُؤْذُونَ الْمُؤْمِنِينَ وَالْمُؤْمِنَاتِ بِغَيْرِ مَا اكْتَسَبُوا فَقَدِ احْتَمَلُوا بُهْتَانًا وَإِثْمًا مُّبِينًا”
بقلم: أحمد محمود شرقاوي
………….
لو عندك أي حكاية غريبة أو مخيفة حصلت معاك أو مع حد تعرفه وعاوزني أكتب عنها في قصة بكرة كل اللي عليك إنك تبعتلي على الخاص كل اللي تعرفه عن الحكاية أو الموقف المخيف ده بدون استئذان وتأكد اني هشوف رسالتك بأمر الله..
………
متنساش لو عجبتك القصة تعمل لاف وتعليق برأيك في كومنت..
ومتنساش تمنشن أقرب صديق لك عشان يتابع معانا القصة أو تشاركها مع اصحابك