البيت طول فترة جوازنا كله هدوء مفيش خناق ولا مشاكل أبدًا… بس الهدوء ده طبعا مش هيقعد لطول العمر يعني….
جه اليوم اللي قلب الهدوء ده رأس على عقب حيث كانت الساعة 3 الفجر كنت نايمة عادي في أوضتي…
صحيت فجأة بسبب إني كنت دايخة وحاسة أني عايزة أرجع كل اللي في بطني وجسمي كله سخن
خرجت من الأوضة جريت على الحمام وفضلت ارجع كذا مرة ولما خرجت من الحمام لقيته خارج من اوضته ولاحظ أن فيا حاجة !!!
” إنتي كويسة ؟
‘ اها انا كو….كويسة
” متأكدة ؟
‘ اه متأكدة
” طيب
مشي من قدامي نظراته بتقول أنه شاكك أن فيا حاجة… بس خبيت عليه لغاية ما اعرف إيه اللي بيحصلي ده…
عدى يومين وكل يوم اصحى بنفس التعب صاحية دايخة وعاوزة اتخانق مع حد معرفش ليه وكل شوية ارجع ومعظم الأكل بقيت مش بطيق ريحته وبحس أن كل أكلة تقيلة عليا…
اتصلت بصحبتي ممكن تقولي على دوa كويس يحل كل حاجة ……
‘ يا حبيبة انا دايخة جدا ومش على بعضي ومن إمبارح شغالة ترجيع…
* الله… إنتي حامل !
‘ حامل ايه يا هبلة لا مستحيل
* لا حامل ده كلها أعراض حمل ألف مبروك يا روحي
‘ لا مش حامل انا متأكدة
*ةإنتي متجوزة بقالك فترة أكيد حامل
‘ لا لا ممكن يكونوا شوية تعب أو أخدت برد لأني بسيب البلكونة مفتوحة لما أنام…
* عليا الطلاق حامل… انا جاتلي نفس الأعراض دي لما كنت حامل في بنتي رنا
‘ سيبك من كده انا عايزة حاجة تخفف الدوخة اللي حاسة بيها دي والترجيع ده لأني زهقت…