” ربنا كريم ” ?قصة حقيقة .. الجزء الثانى والاخير
الدكتور قالي معلش يا بنتي أصل واحنا بنحقن قفلنا على الشريان المغذي لرجلك
و المادة مينفعش تتشال أصلها بتلزق زي الجبس !!!
و في سط كل اللي بيحصل ده ولادي مع أمي معرفش عنهم حاجة ،
أحمد جوزي متكفل بكل حاجة ، معايا عند الدكاترة ، بيحميني ، بيأكلني ،
كان يقف في المطبخ يقولي عرفيني الأكل بيتعمل ازاي و يصورلي و هو بيعمله ،
كنا ساكنين في الرابع كان يشيلني على أكتافه كل مرة نعمل جلسات علاج طبيعي ي
وديني و يجيبني ، في مرة عملت تويلت في المستشفى اتصلت بيه الفجر جالي
و معاه هدومي و حماني رغم ان مرات خالي معايا ..
والله والله يا رضوى ما تعب في يوم و لا كَل ..
اتعرض عليه الجواز من القريب و الغريب..
لدرجة إن بابايا قاله انت عملت اللي عليك لو اتجوزت ده حقك ،
قاله يعني أنا واخدها فراشة زي القمر و لما يحصلها حاجة اخلع و اسيبها
يعني لو حصلي انا حاجة كانت هتسيبني..؟
فضلنا أكتر من أربع سنين في المتاهات دي ،
عملت كمية عمليات متتعدش لحد ما أفلسنا ،
انتهى بيا الحال إني خلاص مبتحركش و جوزي هو اللي بيعمل كل حاجة ،
و في يوم كان أحمد في الشغل وانا بيتي شكله مش عاجبني نفسي أقوم ،
جيت أجرب اقوم لقيت نفسي بقوم ،
رجلي اتحطت على الأرض عادي ،
بقيت اتسند وانا طايرة من الفرحة لميت الهدوم و رتبت الاوضة
هو جاي من الشغل استغرب قالي هو مين اللي كان هنا ؟
لما قلت له انا اللي عملت كده شالني و طار بيا و فضل يعيط
الدكاترة قالولنا اللي حصلك ده مدرسناهوش في الكتب ،
دي معجزة ، إن شريان ينبت و يفضل يتمدد طول الفترة اللي انتي راقدة فيها
لحد ما وصل العصب و غذاه و الرجل ترجع تملا تاني..❤
والله العظيم يا رضوى التراب اللي أحمد جوزي بيمشي عليه على راسي من فوق ❤
( صاحبة القصة أسماء سالم في حوار علي برنامج تلفزيوني)
ربنا كريم ♥️