زهرة: أخوك اللي لسه في تالتة ثانوي دا؟
عمر: أيوا
زهرة: عمر بطل جنان هو دا عارف يتحمل مسؤولية منهجه عشان يروح يتحمل مسؤولية جواز
عمر: صح…. طب تعالي ندخل نشوف في إيه ولا مين اللي هنا؟
سابوا الشنط ورا الباب بعد لما قفلوه، ودخلوا ناحية المطبخ لقوا أخو عمر بيعمل ساندوتشات وبيرص عالصينية
عمر بهمس: مش قولتلك يمكن اتجوز وأهو بيعمل الغدا لعروسته
خبطته في دراعه وقالت: احم… ازيك يا عمار
بصلها عمار بصدمة وقال: إيه دا دخلتوا امتى؟
عمر: دلوقتي بس إيه دا اللي بتعمله، ودخلت أصلا إزاي؟
عمار: دخلت بالمفتاح، أنت عارف بقى إني ثانوية عامة وكدا وعايز هدوء عشان أركز وأعرف أذاكر
كان عمر بيسمعله وبيهزله راسه
وعمار مكمل: ففضلت بقى أتحايل على ماما عشان تخليني أجي أقعد هنا الأسبوعين اللي أنتم مسافرين فيهم، وعشان لسه عماتك وعيالهم عندنا في البيت وكل شوية ينطولي في أوضتي
عمر: فاستغليت غيابنا واستوليت عالشقة
عمار: لأ ماتقولش كدا طبعا، يعني مش استوليت عليها كلها أصل لما أمك وافقت بصعوبة على قراري جت وقفلت باب أوضتكم بالمفتاح وخدته ومشيت
وبعدين يعني أنا ساكن في شقة أختي زهرة اللي هي مراتك يعني فأكيد مش هتقول حاجة عشان طيبة وبتحبنا
عمر: اممممم
طب زي الشاطر كدا تجيب الساندوتشات اللي عملتها دي وتاخد هدومك وترجع على بيت أهلك من غير مطرود
زهرة بسرعة: إيه اللي أنت بتقوله دا يا عمر بتطرد أخوك؟
عمار: شايفة يا زهرة يا أختي اللي جوزك بيعمله فيا أصل الأخوات في أجازة
زهرة: ماتزعلش يا عمار بيهزر معاك
عمر: لأ مش بهزر.. يلا يا ياض من هنا وروح عرف أمك إننا جينا لغاية ما نرتاح من السفر تكون جابت عماتك وجت
عمار بضيق: ماشي يا عم بكرة لما يكون ليا شقة مش هدخلك فيها، ولا عيالك كمان ولو زهرة طردتك في يوم ابقى روح عند أمك اغضب عنها عشان مش هفتحلك باب شقتي
عمر بسخرية: خليك في اللي أنت فيه ياض
ومش تنسى تقول لماما تبقى تجيب معها مفتاح الأوضة
عمار وهو بيلم هدومه في الكيسة اللي جابهم فيها قال: مش قايل لها حاجة
عمر: هتصل عليها عادي يعني
مشي عمار، وقالت زهرة بزعل: ليه زعلته يا عمر كدا؟ يعني أنت المفروض تكلمه بهدوء مش تهينه كدا قدامي هو مش لسه عيل صغير
عمر: أنا هصالحه أصلا وبعدين هتلاقيه جاي معهم بعد ساعة لما يروح يقولهم… أخويا وأنا حافظه وعلى فكرة مش بيزعل مني لو كان يعرف إننا جايين النهاردة كان مشي من امبارح وظبط الشقة، بس أنا برخم عليه
زهرة: أتمنى فعلا إنه مايكونش زعل، طب هروح أدخل الشنط دي في أوضة الأطفال
عمر: ماشي وأنا هروح أعمل كوبايتين شاي الواد عامل ساندوتشات حلوة أوي وكدا هصالحه بطريقة أحلى
ضحكت زهرة عليه، ودخلت شنطتها وهو دخل شنطته وراها وطلع لغاية ما تطلع لبس مريح
بعد نص ساعة كانوا بياكلوا، فقالت زهرة: طب مش كنت تسيبه ياكل معنا من السندوتشات اللي تعب فيها دي
عمر: زمانه أصلا راح ياكل من الأكل اللي ماما عملته لينا بما إنها عارفه إننا جايين النهاردة
زهرة: ماشي
خلصوا والعصر آذن، وقاموا يتوضوا ويصلوا
يتبببببببببببببببع