بعد ساعة كانت والدته وصلت ومعها الأكل اللي عملته ليهم، وكمان أهل زهرة جم وعمات عمر جم، ومعهم عمار
سلموا عليهم، وبعدها نادى عمر على أخوه وخدوا ودخلوا الأوضة وقفل الباب
عمار: أنت بتقفل الباب علينا ليه الناس تقول إيه يا عمر أنت أخلاقك باظت ولا إيه؟
عمر وهو بيشده لحضنه قاله: بطل دراما يا ياض
عمار بضحك: اللي يشوفك دلوقتي مش يشوفك من شوية وأنت بتطردني من بيتك
عمر: اسمه بيتنا احنا الإتنين، ويبقى بيتك قبل ما يكون بيتي
بقلم إسراء إبراهيم عبدالله
عمار: وحشتني أوي بجد لما غبت الأسبوعين دول، أنا هبقى أجيلكم على طول عشان حقيقي مش متخيل البيت من غيرك كدا هقعد بس شوية صغيرة وأمشي عشان أذاكر وأجيب مجموع كويس
عمر وهو بيبعد عنه قال: تيجي في أي وقت يا حبيب أخوك، وإن شاء الله تنجح مجموع كويس
عمار: إن شاء الله
راح عمر ناحية الدولاب وطلع منه هدية متغلفة وقال لعمار: اتفضل الهدية دي من أخوك وأتمنى تعجبك
خدها عمار بفرحة وقال: أكيد هتعجبني كفاية إنها منك ودايما بكون على بالك وعايز تفرحني
كان بيفتح فيها وبص لأخوه بصدمة وفرحة وقال: اللي أنا شايفه دا حقيقي؟
هزله عمر رأسه بابتسامة وقال: ماقدرش أشوف نفسك في حاجة وفي إيدي أعملها وأتاخر فيها
حضنه عمار بقوة وقال: ربنا يحفظك ليا ومايحرمنيش منك
عمر: ولا منك يا غالي
عمار: هخلي الموبايل هنا لغاية ما نيجي نمشي وكمان ريحة البرفيوم دي حلوة أوي وباين لها غالية زي الموبايل
عمر: مافيش حاجة تغلى عليك يا حبيبي… يلا نطلع بقى ليهم بدل ما يشكوا فينا
ضحك عمار وطلعوا قعدوا مع أهلهم، وزهرة لمحتهم والفرحة باينة على وشهم فابتسمت
فقالت عمة عمر: تعرفي يا زهرة اتحايلنا على عمر كتير يتجوز بنت عمه مارضيش ولما اتجوزتوا بسرعة شكينا فيه بس بعدها بقى فهمنا الموضوع من والدته
هنقوم نمشي بقى ونسيبكم ترتاحوا
قامت معهم والدة عمر وبصتلهم وقالت: يلا يا عمار عشان نسيبهم يرتاحوا
عمار: تمام هجيب حاجة وأجي، ودخل يجيب الموبايل والبرفيوم وحطهم في شنطة وسلم على أخوه ومشي معهم
قفل عمر وراهم الباب لقى زهرة دخلت الأوضة خاف من نظرتها وسكوتها ليسبب مشكلة اتنهد ودخل يشوفها
ياترى ممكن يحصل مشكلة بسبب كلام عمته؟
يتبببببببببببببببع