فضلت تخبط مرضتش عليها لحد ما باب البلاكونه اترزع لواحده! كأن حد هو اللي قفله بـ ايده.. اول حاجه قولتها بسم الله الرحمن الرحيم.. وحطيت ايدي على قلبي وابتديت اقرب بـ بطئ! لحد ماوصلت لـ باب البلاكونه، وأول ما لمسته اتنطرت بعيد وقعت على رجلي..
لدرجة ان انا حسيت انها اتكسرت من شدة القوه!..بقيت اصوت من تعبي ومش قادره اتحرك لحد ماعافرت بكل قوتي وقومت قعدت على الكنبه وطلعت موبايلي أكلم اخويا واحكيله على اللي بيحصل..
لقيت الحيطه بيترسم عليها بـ دـm لحد ماتكتبتلي كلمة(بلاش) خوفت اتصل بيه يجراله حاجه بسببي! اتراجعت عن اتصالي بيه وقررت اواجه كل ده لواحدي!
طلعت أجري على الكاسيت أشغل قرآن.. حطيته جنب مني وقريت قرآن ونمت وتاني يوم لقيت واحده من جيراني بتخبط عليا فتحتلها وحكيتلها على اللي حصل..قالتلي انها هى كمان بيحصل معاها كده بس كل ماتيجي تتكلم حاجه تمنعها..
سألتها عن موضوع الش/يطان ده..وقبل ماتتكلم لقيت صوتها اتغير!..جارتي فقدت النطق!.. كانت بتشاورلي بـ ايديها وبتحاول تعرفني اللي حصلها.. خدتها ونزلنا المستشفى.. ولما الدكتور كشف عليها قالنا ان حصلها قطع في الأحبال الصوتيه وانها مش هتقدر تتكلم تاني!..
الخبر نزل عليا زي الصاعقه.. ومن كتر مانا مدايقه من جارتي التانيه قررت اروحلها بـ نفسي واواجهها بكل حاجه!..
خبطت عليها وفتحتلي الباب ورحبت بيها زياده عن كل مره.. ولما دخلت قالتلي انها هتجهزلي عصير.. ولكن انا رفضت وقولتلها ان انا مش جايه اتضايف عندها.. ولااراديًا ظهر مني سؤال معرفش ازاي.. قولتلها انتي ايه علاقتك بالدجال!..
سكتت وبصتلي في صمت.. كانت شويه تبتسم وشويه تكشر لدرجة ان انا مابقتش عارفه هى مبسوطه ولا زعلانه!.. ابتدى صوتي يعلى وقولتلها ايه علاقتك بالدجال!..
سابتني ودخلت الأوضه وقفلت الباب وراها وسابتني لواحدي في الصاله!.. ببص يمين لقيت جوزها قاعد وفي ايده جرنال صحفي..مكنش بيعمل حاجه غير انه بيقراه!..
قربت منه وانا كلي خوف وبصيت في الجرنال اللي كان مكتوب فيه كل الكلام بالدم!..وابتدا جوزها يبصلي بـ بطئ واول مابصلي اختفى من مكانه..
جريت اخبط على جارتي وبقيت ازعق وقولتلها انا من حقي اعرف ايه اللي بيحصل ده..خرجت وقالتلي عايزه تعرفي مش كده! قولتلها اه عايزه اعرف.. قالتله اخرج.. لحد ماخرج!
خرج الشيطان من أوضة جارتي..أول ماشوفته ديرت وشي وصَوَت مقدرتش ابص في وشه من شدة بشاعته اللي مفيش انسان يتحملها!!..
جسمي لااراديًا بدأ يترعش بقوه!!..لحد ما رجعت بـ ضهري وانا بصوت وسامعه صوته البشع!..الصوت اللي لو سمعه الميت هيصحى من تربته!..
لحد مااغم عليا وفقدت الوعي تماماَ..لحد ما صحيت على صوت اهلي كنت باخد نفسي بسرعه وعندي ضيق تنفس شديد!..ماما اول ماشافتني في الحاله دي قالتلهم هاتولها مايه بسرعه!..كنت بنهج وببص حواليا في الاوضه وعينيا مبرقه! ببلع ريقي بصعوبه..
واللي بيكلمني مبردش عليه..قربت ماما مني ولمست ايدي اللى بتترعش..وقالتلهم لازم نوديها لـ دكتور يتابع حالتها..وبعد ماشربت المايه.. شالوني وركبوني العربيه وراحوا بيا على المستشفى.. ندهوا الممرضين لحد ماجم وخدوني جوا.. والدكتور جه وكشف عليا..
والغريبه انه قالهم ان انا سليمه ومفييش أي حاجه!..اهلي وجوزي استغربوا وقالوله ازاي وهى في الحاله دي!..لحد ما الدكتور أكدلهم بالتحاليل والأشعه ان انا سليمه!..
وعلشان مكانوش مصدقين الدكتور.. خدوني لـ دكتور تاني!.. والمصيبه الأكبر هنا انه قال نفس الكلام!..بقى اهلي كلهم بيبصوا لـ بعض ومستغربين!..ورجعت البيت وخدت شوية مسكنات!..
واليوم ده ماما مرضتش تروح وقالت لازم تبات معايا لحد مااكون كويسه!.. نزلوا كلهم وكل واحد رجع بيته.. وماما نامت على الكنبه.. وفي نص الليل صحيت على ألم مميت في ضهري..كأن سكاكين ماشيه على ضهري.. كمية ألم مش طبيعيه..
بدأت أتوَجع لحد ما ماما صحيت على صوتي.. قولتلها شوفي ضهري ماله!.. رفعت الهدوم من على ضهري وكانت الصدم#مه!..ضهري متشرح بالطول كأن صوابع طويل ماشيه عليه!..الجرح طويل وعميق! محتاج يتخيط!.. بقيت أصرخ بكل ما فيا!.. وماما مش عارفه تتصرف!..
لحد ماطلعت الموبايل واتصلت بـ بقيت أهلي..والمشكله هنا ان جوزي كان دايمًا مسافر علشان شغله واليوم ده جه ورجع الشغل تاني!..وكل ما ماما تتصل تلاقي نور الصاله بيقيد ويطفي!
قالت بسم الله..وقامت من مكانها تبص لحد ما لمحت رجِل طويله معديه في الضلمه.. صوتت ودخلت الأوضه عندي وقفلت الباب بسرعه..وبدأت تتشاهد.. أشهد أن لا إله إلا الله وأن محمدًا رسول الله..
ضربات قلبها زادت بس انا مكنتش عارفه اساعدها لان الالم كان شديد عليا ومحتاجه اللي يساعدني!.. ماما وطيت على الأرض وقعدت بضهرها وهى بتذكر اسم الله..لحد ما لقيت باب الأوضه بيخبط!..
قامت من مكانها وهى مبرقالي ودقات قلبها زايده وبتنهج!.. لحد ماقربت مني وقعدت في انتظار ان اللي بيخبط يدخل!..سمعت صوت جارتي برا بتقولي افتحي متخافيش دي انا.. قولت لـ ماما أوعى تفتحي دي مش جارتي !..فضلت تتشاهد وتذكر اسم الله لحد ما الآذان أذن!..
وقتها كل حاجه اختفت حتى صوت التخبيط وقف!..والصبح اهلي وصلوا وخدوني على المستشفى..الدكتور كشف عليا واتأكد من وجود الجرح..اداني البنج وبدأ يخيط!.. وبعد ماخلص سألهم ايه اللي حصلها؟..ماما قالتله ان وقعت على ضهري في المزرعه فوق أدوات حاده!..
معرفش ليه كدبت ومقالتش الحقيقه!.. ولما رجعنا..دخلتني ارتاح على السرير وقبل ماتخرج سألتها كدبتي ليه؟..قالتلي كدبت في ايه؟..
وبعد مااتكلمنا اتضحلي انها مش فاكره أي حاجه من اللي حصلت! وكل الباقي اتمسح بـ استيكه!..مسكت ايديها وقولتلها تشوفلي شيخ..قالتلي حاضر هشوفلك بس ارتاحي الأول!..
وبعد مادخلت المطبخ وسابتني ارتاح..شوفت جارتي قدامي وهى بتدبح جوزها بـ سكينه! كانت بتضحك وهى بتقتله! وبعد ماخلصت خدت بـ صوابعها من الدم اللي على رقبته!.. وحطيته على رقبتها ورسمت بيه خط!..كنت متبنجه ومش عارفه اتحرك في اللحظه دي..
لحد ماكل ده اختفى كأنه فيلم وخلص!..وشوية وسمعت ماما بتكلم حد في الموبايل وبتقوله يبعتلنا شيخ موثوق النهارده!.. وبعد ماخلصت كلام دخلتلي تطمني ان الشيخ جاي النهارده..قلبي ارتاح وقتها وقولت يمكن كل ده حلم!..وفي أثناء وصول الشيخ لينا جالنا مكالمه انه عمل حادثه وم١ت موته بشعه!
الخبر نزل عليا زي الصاعقه أول ماعرفت ان الشيخ عمل حادثه وم١ت!..فضلت أعيط وماما بتهديني!.. وبعد شويه جالنا خبر انهم لقوا الشيخ مشنوق فوق شجره وميت موته بشعه مش زي ماقالوا انه عمل حادثه!..الشرطه جات في مكان الواقعه وبدأوا يحققوا في الموضوع!..
وانا طول اليوم كانت أعصابي تعبانه جدًا وبعد مرور يومين على نفس الحال كانت ماما لسه قاعده معايا..لحد ما طلبت منها ترجع بيتها وتشوف حياتها اللي وقفت علشاني!..رفضت ولكن انا أصريت!
لحد ما فعلًا خدت هدومها ورجعت البيت وانا فضلت قاعده لواحدي..اتفقت مع جوزي اننا نغير الشقه وناخد في مكان تاني..وافق وجه من السفر وجاب ناس تنقل العفش وفي وسط ما هما بينقلوه.. لقيت جارتي جايه بـ نفسها ومعاها هديه للمره التانيه!
انا بمجرد ماشوفتها جسمي اتلبش وقولت أكيد في مصيبه جايه وراها!..والغريب انها كانت بتتكلم بإحترام مش طبيعي على غير العاده رغم ان طبيعتها مش كده خالص!..وقالتلي ان انا عندي حق أخاف منها بعد اللي حصل..وقربت من ودني وقالتلي هقولك سر بس متقوليش لحد!..قولتلها قولي.. قالتلي انا اللي قتلت الشيخ..
بصيت في وشها لقيته متغير..دي مش ملامحها!.. دي ملامح الشيخ وهو مقتول!..رجعت بضهري وفضلت أصرخ بقوه لحد ما كل اللي حواليا قربوا مني وسندوني وانا لسه بصوت.. قولتلهم ان جارتي قدامي!.. كلهم قالوا مفيش حد طلع!..
يتبع….