لكن المنظر المرعب اللي شوفته في اوضتها مكانش منظر الكتب الغريبة ولا منظر الشمع، ولا النقوش اللي ظهرت على الحيطان فجأة مش عارف ازاي..
الحاجة المرعبة في القصة ان شنطتها اللي كانت جاية بيها مكانش فيها هدوم، كان فيها 11 جمجمة ل 11 ججث0ة..
كل جمجمة فيهم مكتوب عليها اسم صاحبها..
دسوقي، زينات، رجب، دلال، عتمان، زينب، عبد البر، فوزية، جاد، فايق، وخديجة..
يا رب يكون اللي انا فهمته غلط وتكون دي مجرد صدفة..
انا اعرف اسامي 3 من اصحاب الجماجم دي..
رجب خالي، وعتمان جوز خالتي وخديجة.. أمي..
تفتكر دا ممكن يكون مجرد تشابه اسامي ؟
يعني صدفة اني اشوف أمي هنا في البيت بعد موتها ب 13 سنة ؟ وصدفة اني الاقي جماجم باسم أمي وخالي وجوز خالتي..
بعد ما شوفت المنظر دا اترعبت اكتر ما كنت مرعوب، وزاد خوفي وقلقي من الست دي ومن اللي بتعمله..
رجعت كل حاجة مكانها وخرجت وقفلت الأوضة، والراجل كان خلص تعقيم، كان فيه مشوار مهم لازم اعمله عشان اتأكد من اللي في دماغي..
عديت على شقة مدام رشا عشان اخد مراتي وحماتي من هناك قبل ما انزل..
ضربت الجرس، خرجت مدام رشا، قولتلها ابعتي الجم١عة بقى وقوليلهم خلاص يقدروا يرجعوا الشقة، قلت لمراتي اني رايح مشوار ومش هتأخر، دخلت الشقة هي وحماتي وأنا نزلت على السلم، بس لقيت مدام رشا بتنادي عليا وأنا نازل..
– استاذ محمد، يا استاذ محمد
= أيوه يا مدام رشا، اؤمري
– انا عايزة اقولك حاجة
= خير
– الست الكبيرة اللي كانت هنا دي تبقى حماتك فعلا ؟
= أيوه
– بص، انا عارفة ان اللي هقوله دا غريب، ويمكن متصدقوش، انت عارف ان الشيخ مصطفى جوزي بيشتغل معالج بالقرآن وياما ربنا كتب لناس كتير الشفا على ايده من السحر والمس وحالات كتير عالجهم من غير اي مقابل لوجه الله كدا
= عارف يا مدام رشا، عارف، ايه علاقة حماتي بالحكاية دي..
– حماتك يا استاذ محمد وراها سر غريب الله اعلم هو ايه، بس مصطفى جوزي بيقول ان الست دي ميتة وان اللي كانت قاعدة معانا مش هي، ده شيطان متمثل في صورتها..
بعد ما سمعت الكلمتين اللي قالتهم مدام رشا حسيت اني مش متزن، بدأت أراجع كل تصرفات حماتي الغير مفهومة اللي كنت بشوفها في الكام يوم اللي فاتوا، دي كانت حابسة نفسها في الأوضة تماما من غير اكل ولا شرب، مراتي كانت بتقول انها اكيد جايبة اكلها معاها، بس انا لما دخلت الأوضة وفتشت في حاجاتها ملقيتش اي أكل، مفيش إنسان في الدنيا يقدر يعيش المدة دي كلها من غير أكل..
بس انا برضو مشوفتش أموات بتتكلم قبل كدا..
بدأت أتذكر الظروف اللي اتعرفت فيها على مراتي..
انا مكنتش اعرفها كويس، مكنتش اعرفها خالص، اللي حصل اني كنت سايق في يوم عربيتي ورايح الشغل وكنت نازل متأخر فكنت مستعجل شوية، خبطت واحدة بالعربية وخدتها وديتها المستشفى، هي دراعها اتكسر بس محصلهاش اي حاجة اكتر من كدا..
بعدها زورتها اكتر من مرة علشان اطمن عليها وهناك اتعرفت على مامتها كانت ست غامضة فعلا، كلامها قليل جدا، ونظرتها غريبة، فيها قوة كدا مش مفهومة، انا مكنتش برتاحلها من اول ما شوفتها، بس حبيت بنتها واتخطبنا 6 شهور وبعد كدا اتجوزنا، مكنتش اعرف اي حد من اهل مراتي غير أمها بس..
ودلوقتي انا لازم اتأكد من حكاية الجماجم دي واعرف هل فعلا اللي انا فهمته كان صح وللا انا كنت غلطان..
وانا في الطريق اتصلت بعم حسين الغفير اللي كان بيحرس مقابر عيلة أمي وطلبت منه يجهز مفاتح المق1بر لأني مش مطمن عشان فيه ناس بتسرق جماجم الاموات وبيطحنوها وبيستخدموها في تصنيع نوع من المخدرات..
طب دا أي كلام بس انا كنت محتاج سبب مقنع اقوله للراجل وأنا جاي أفتح مقابر عيلة أمي بعد المدة دي كلها..
بدأت بالمدفن بتاع والدتي، عم حسين فتحلي ونزلت القبر تحت واتفاجئت ان الكفن كان مفتوح وكل اللي جواه عامود فقري مقطوعة منه الراس..
ودا نفس اللي لقيته في قبر خالي وجوز خالتي..
ال 3 جماجم مكانوش موجودين في مكانهم لإنهم ببساطة موجودين في مكان تاني.. عندي في البيت..
روحت في اليوم دا وانا مصمم افهم اللي بيحصل، بس قررت ما اكونش لوحدي..
كلمت واحد صاحبي اسمه كريلس كان لسه راجع من امريكا بقاله أسبوعين بالظبط..
كريلس كان الوحيد من اصحابي اللي مهتم بالظواهر الغريبة اللي زي تناسخ الارواح والسحر الأسود والحكايات دي كلها وكان بيعمل أبحاث كتير في المجال ده..
اتصلت بيه في التليفون وحكيتله القصة كلها..
كريلس قالي ان فيه منظمة ظهرت في امريكا من حوالي عشر سنين كل أعضاءها بيعبدوا الشيطان وبيقدموا ليه قرابين بشرية والأمر بيوصل انهم بينتحروا والشيطان بيسكن أجسادهم علشان يمنحهم الخلود، وبيعيشوا وسط الناس علشان يحققوا اهداف لوسيفر، إلههم اللي بيعبدوه..
وحكاية الجماجم اللي حماتي بتستخدمها دي فدا طقس كان بيحصل برضو في امريكا مع أعضاء الجمعية دي ضمن
طقوس استدعاء أرواح الموتى وتسخيرها..
قولتله بس كل دا في امريكا مش في مصر..
قالي مش بعيد يكون فيه ناس بتمارس النشاط دا في مصر وتكون حماتي واحدة من الناس دي..
اتفقت مع كريلس اني هروح البيت وهو يحصلني بعد شوية كإنه جاي يزورني وهحاول اشوف طريقة تانية تخلي حماتي تخرج من اوضتها بحيث انه يقدر يشوف كل حاجة بعينه..
روحت البيت.. مراتي كانت مستنياني على الغدا كالعادة، والغريبة ان حماتي كمان كانت قاعدة معاها على غير العادة ومستنياني برا اوضتها.. لما دخلت البيت حماتي طلبت من مراتي تسيبنا شوية لوحدنا، طبعا هي منفذتش الطلب دا بسهولة لأنها مكانتش فاهماه، بس في النهاية دخلت جوا وسابتني مع مامتها، وبدأت حماتي تتكلم..
– مبقاش ينفع نخبي على بعض دلوقتي، انت عرفت كل حاجة وعرفت انا مين بس انت اكيد متعرفش انا هنا بعمل ايه، ولا عرفت حكاية الجماجم اللي لقيتها في اوضتي، انا هفهمك كل حاجة، انا لوسيفر، حامل الشعلة المقدسة، انا فيه ناس بتعبدني من آلاف السنين، وعايش جوا أجساد ناس كتير انت بتشوفهم وبتتعامل معاهم وانت متعرفش انهم أموات وانا اللي بحركهم، انا موجود في العالم علشان احرر سكانه من المoت، اوهبهم الخلود الأبدي..
يتبع….