ساعتها اتعصب وقالي طب هي فين ؟ مافيش حاجه انتي بس من كتر مانتي حطاها في دماغك حلمتي بيها مافيش حاجه..
خد من ايدي الس،ـكينة وحطها في المطبخ وهو عمال يستغفر ربنا ومضايق جدا وانا فضلت اعيط بعدها جه وحضني وطبطب عليا قالي معلش خلاص مافيش حاجه..
بطلي تبصي عليها كل شويه وانسيها..
فضلت سهرانه طول الليل يومها ما عرفتش انام وانا عماله اتخيلها وهي بتبصلي من بلكونتها.. وما نمتش غير الصبح بعد ما عماد نزل بعد ما عملتله فطار ودخلت انام..
صحيت على المغرب تقريبا وانا حاسه اني تعبانه..
كلمت عماد قولتله هات اكل معاك عشان ماعملتش غدا النهارده.. قالي ماشي وقفل عشان كان مشغول..
وانا فضلت ارتب في الشقه شويه وعيني كل شويه تيجي ناحية الشباك عايزة ابص عليها ؟! يا ترى لسه واقفه وبصالي ؟ ولا كان بيتهيئلي..
الفضول كان هيموتني وعايزة اكسر الخوف اللي بقى ماليني من جوه..
قربت من الشباك بالراحة ومسكت الستارة وفتحتها سنة عشان أبص منها مالقتهاش واقفه على شباكها قفلت الستارة بسرعه وقعدت على الكنبة وارتحت شويه..
بعدها دخلت اغسل المواعين..وجهزت هدوم عشان اخد شاور.. واول ما فتحت باب الحمام لقيتها واقفه في وشي بتبرقلي
ولابسه العباية السوده..قفلت باب الحمام بسرعه وصرخت ورميت الهدوم وطلعت اجري عالمطبخ جبت الس،ـكينة.. فضلت ادور ع الموبايل عشان اتصل بعماد مالقتوش..انا ناسياه في الاوضه اللي في وش الحمام
وانا مش عايزة اقرب من الحمام وخايفه..
فضلت قاعدة في الصاله وماسكة الس،ـكينة..
فضلت مستنية وانا عماله اعيط ومش قادره اخد نفسي
لحد ما عماد جه لقاني قاعدة ماسكة الس،ـكينة..
قالي في ايه يا ياسمين ؟ قولتله دخلت الحمام عشان استحمى لقيتها واقفه وبتبصلي..
قالي كفايه جنان بقى ودا كله لسه في الحمام من امبارح يعني..
دخل بسرعه على الحمام وفتح الباب ونور النور وبعدها جالي مسك الس،ـكينة ورماها على الارض وخدني من ايدي ودخلني الحمام قالي هي فين ؟ قوليلي هي فين ؟ جايز دخلت جوة السيفون وانا مش عارف ؟!
فضلت ساكته وبصيت لعماد وقولتله انا مش مجنونه يا عماد انا شوفتها ؟
وقعدت على الارض وفضلت اعيط..
بعدها عماد طلع واتصل بواحد صاحبه يعرف شيخ
قالي بعدها في شيخ هيجي بكره خلاص كده ارتحتي يلا قومي عشان ناكل قولتله مش عايزه اكل حاجه وجريت على اوضتي ونمت على السرير وانا بعيط..
بعدها لقيت عماد جايب صنيه فيها الاكل وجه قعد جمبي وقالي يلا عشان انا ميت من الجوع وماكلتش حاجه من ساعة الفطار ومش هاكل من غيرك يلا..
فضلنا ناكل سوا وانا كلت لقمتين وشبعت وعماد كمل بقية الاكل ودخل ينام جمبي..
فضلت صاحية ومش جايلي نوم لحد تاني يوم..
عماد نزل الشغل.. وانا قومت طالعه قاعده عالكرسي جمب الشباك وفضلت باصه بالعند على شباكها وشباكها مقفول..
فضلت كده والنوم كان بيكبس عليا لحد ماقعدت عالكنبه ونمت صحيت على العشا تقريبا.. فاضل ساعه وعماد يرجع
كنت حاسه اني عايزة ادخل الحمام فضلت ماسكة نفسي لحد ما عماد يرجع بس ما استملتش خدت الس،ـكينة
وروحت ع الحمام حطيت ايدي ع الاكرة بالراحة وفتحت الباب مالقتش حاجه دخلت الحمام وخلصت وطلعت ببص عالصاله لقيتها بتجري في الشقة عندي صرخت ودخلت الحمام تاني وقفلت الباب..
وفضلت اعيط انا لو طلعت من هنا مش هرجع الشقه دي تاني انا اتخنقت..سامعها عماله تجري في الشقه وتكسر كل حاجه وعماله تدب على الارض جامد..
فضلت قافله على نفسي في الحمام لحد ما سمعت صوت خطواتها بيقرب من الباب مسكت الس،ـكينة جامد وبعدها الصوت اختفى قربت من الباب عشان اسمع كويس سمعت موبايلي بيرن بره كتير فضل يرن وصوت الخطوات اختفى خالص..
فضلت مقربه من الباب بحاول اسمع الخطوات
بس فعلا الصوت راح وفجأة سمعت صوت خبط على باب الحمام جامد الس،ـكينة وقعت من ايدي من الخضه
وفضل الخبط على الباب كأن حد بيضربه بشاكوش
وانا بعدت عن الباب ومسكت السكينه وقومت مقربه من الباب اسنده عشان ما يتفتحش او الترباس يتكسر
فضلت سانده الباب لحد مال الصوت اختفى مع صوت فتح باب الشقه سمعت صوت عادل ومعاه حد
لقيت عماد بينده عليا ندهت عليه من الحمام قالي مش بتردي عليا ليه ؟ قولتله كانت بتجري في الصاله وكانت هتكسر عليا باب الحمام قالي خلاص اطلعي انا معايه الشيخ اطلعي.. فتحت الباب بالراحه عشان اتاكد انه عماد طلع عماد فعلا خدني ودخلت اوضتي ولبست الحجاب وطلعت معاه لقيت الشيخ واقف في الشقه وعمال يستغفر ربنا
بعدها طلب مية من عماد جابهاله وفضل يقرا عليها وبدأ يرش في كل اركان الشقه بعدها قالي في جـn هنا انتي فضلتي وراه لحد ما جالك ومكنش هيعرف يخش لولا انك فتحتيله لما خبط عليكي الباب ودخل بعدها الشيخ فتح باب الشقه وفضل يرش.. ويقرا حاجات بصوت واطي..وبعدها بص من الشباك عالشقه اللي قدامنا ماكنتش واقفه ساعتها قالنا انا هروح للست المسكينة دي اكيد عندها مشكله مع الجن ده ومش عارفه تحلها
وقالي خلاص كده ما تقلقيش الجن اللي جالك هنا مش مؤذي بس انتي اللي شديتيه انه يجيلك لما فضلت تبصي عليه كل شوية.. وهو دلوقتي مشي خلاص..بعدها نزل الشيخ مع عماد وقالي ماتخافيش هو كده طلع بره البيت..
فضلت باصه عليهم من الشباك وهما بيعدو الشارع وبيكلموا البواب بتاع العمارة اللي هي فيها.. وبعدها عماد سلم على الشيخ والشيخ مشي وعماد طلع البيت وهو مستغرب وقالي حاجه غريبه.. قولتله ايه اللي غريب ؟ قالي لما سالنا البواب على الست العجوزة اللي في الدور الرابع قالنا انها م0اتت من شهر ومافيش حد في شقتها
تمت..