بسمه كانت شايله ابنها وبتمشي بخطوات واسعه وطاهر مش فاهم جوزها كان مع طارق اخوه ورجالتهم هناك بيعمل ايه؟
خرج من افكاره على صوت الدكتور وهو بيقف قدام غرفة العناية وبيشاورلهم على اتنين من المصابين بيظهروا من خلف زجاج غرفة العناية المركزة وقال.
الدكتور: دول اتنين من المصابين واحد منهم صاحب الاسم اللي بتسألوا عليه.
بسمه قربت منه بلهفه وهي شايله ابنها وبصت عليهم بتركيز وشافت شاكر جوزها وهو نايم والاجهزة متوصله بجسمه وصرخت اول لما شافته.
بسمه: ايوا هو جوزي شاكر.
طاهر بص عليه بدهشة وسأل الدكتور.
طاهر: هو حالته ايه يا دكتور؟
الدكتور: كان واخد طلقتين.. منهم واحدة في كتفه اليمين وفي طلقة كمان كانت في رجله.
بسمه بصت للدكتور بصدمة وخوف: يعني حالته صعبه ولا ايه يا دكتور؟
الدكتور: الطلقة اللي كانت في الكتف آثرت على حركت دراعه اليمين واللي كان في الرجل اضطرينا لعمل عملية بتر للرجل الشمال.
بسمه صرخت بكل صوتها وطاهر كلمها بهدوء: اهدي يا مدام بسمه ان شاء الله هيبقى كويس واحنا مش هنسيبه.
بسمه بتهور: انتوا اصلا السبب.. اخوك هو اللي من ساعة ما دخل حياة اختي وهو دمر حياتنا كلنا.. احنا كان مالنا ومال المصايب بتاعكم دي؟؟ جوزي خسر دراعه ورجله بسبب اخوك.
طاهر كتم غضبه بسبب كلامها وقالها: انا معرفش جوزك كان معاهم ليه بس صدقيني طارق اخويا مستحيل يعمل كده وياخد جوزك معاه ويعرضه للآذى وهو ملوش ذنب!
بسمه وهي بتبكي: ايوه جوزي ملوش ذنب يحصل فيه كل ده بسبب اخوك!!
وبكت اكتر وقالت: اكيد شاكر راح معاهم كان فاكر انه هينقذني.. وانا اللي ظلمته وفكرته مش خايف عليا.
طاهر بص للدكتور بقلة حيلة والدكتور قرب منها وقالها: يا مدام حاولي تهدي وصدقيني جوزك هيكون كويس ودراعه ان شاء الله هيتعالج مع دكتور متخصص في العلاج الطبيعي ورجله تقدروا تجيبوله جهاز قدم صناعي وهيرجع يمشي ويعيش حياته عادي جدا وتحمدي ربنا انها جت على قد كده.. الحادثه دي وصل للمستشفي اكتر من 50 قتيل وجوزك ربنا نجاه من الموت.
بسمه بصت ل طاهر وقالت بغضب: منهم لله اللي كانوا السبب.
طاهر زفر بغضب وكلم الدكتور: لو سمحت يا دكتور اي شئ هيحتاجه مسؤول مننا لحد مايقف على رجليه وياريت تبلغني بكل جديد.. عن اذنكم.
ومشي طاهر وسابهم وبسمه كانت بتبص عليه بغضب وسألت الدكتور مرة تانيه: الكلام اللي قولته ده حقيقي يا دكتور وجوزي هيتعالج فعلا؟
الدكتور: طبعا يا مدام متقلقيش.. عن اذنك.
بسمه وقفت تبص على شاكر وهو نايم جوه غرفة العناية وهمست وهي بتبكي: ياحبيبي يا شاكر انت عملت كل ده عشان وكنت عايز تضحي بحياتك عشاني انا وابنك..
وبصت لابنها وابتسمت وقالت: شوفت بابا كان مستعد يضحي بحياته عشانا ازاي..رواية حب مجهول الهوية بقلمي ملك إبراهيم.
بعد مرور يومين.
قدام غرفة العناية اللي فيها طارق.
انا وطاهر قاعدين والدكتور خرج وهو بيبتسم.
الدكتور: الباشا بدأ يفوق وكل المؤشرات مطمئنه جدا الحمدلله.
انتفضت من مكاني بلهفة: بجد يا دكتور يعني طارق فاق وفتح عينيه؟؟
الدكتور ضحك: اه الحمدلله واتكلمت معاه كمان بس هنحتاج ١٢ ساعه كمان يفضل في العناية وبعدها نقدر ننقله لغرفة عاديه وتقدروا تشوفوه.
طاهر بسعادة: الحمدلله يا دكتور بس هو كويس حالته كويسه يعني؟؟