شايف ده فى عيونها وغيرتها
قعدو خارج البيت قدام النيل واكواب الشاى بطوف بينهم
رعد وحنان وعايشه
الغجريه فضلت داخل الدار، بتطبب محمود، بتحط على جبهته كمادات ومع كل لمسه قلبها بيدق اكتر
لحد ما سابت ايدها فوق دماغ محمود وهى بتعاين جرحه النضيف
محمود كان بيئن وكل تنهيده بتقطع فى قلب الغجريه
لحد ما جسمها ارتعش
هو فيه ايه سألت نفسها، مالك يا داريا؟ اثبتى شويه
انتى مش مكتوبلك الحب ولا العشق والغرام
دا كلام مواويل يا داريا
انتى غجريه وغريبه من غير اصل ليه تخلى عقلك وقلبك يعمل فيكى كده؟
دخل رعد يطمن على محمود ولقى داريا شارده خالص
ايدها بتملس على محمود من غير كمادات كانه طفا صغير والدته بتنيمه
ضحك رعد، دا الحب بعينه
اصل محدش يعرف إلى بيحب غير عاشق زيه
بالسرعه دى سأل نفسه، ممكن يحصل؟
سعل رعد، امال يا ست داريا انتى مقعدتيش معايا زى محمود وخدتى بالك منى ليه؟
داريا كانها اتمسكت بتعمل حاجه غلط وقفت مزعوره
وقالت، الشاب جسده ضعيف
لكن انت ماشاء الله جسدك عفى يا رعد
انا همشى دلوقتى واجى ابص عليه الصبح
ابتعدت داريا عن البيت لكن قلبها مكنش معاها
سابها وقعد على الفراش جنب محمود فتح محمود عينيه بضعف، الأصابه لم تكن خطره لكنه عيار نارى
وجد حنان راقده على حصيره من القش إلى جوارها فتاه لا يعرفها، فى منزل بسيط لم يزوره من قبل
تألم محمود بوهن ثم رمق حنان وهى ترقد بسلام، هى دى حنان إلى كنت عايز اقتلها؟
لكن مين البنت إلى جنبها؟
ملامح هاديه عاديه غير ملفته، لكن وجه طيب خالى من الخبث واللؤم
مين دى
وفين رعد؟
عايشه نومها خفيف، صحيت لما سمعت محمود بيتألم
قربتله الميه وهى بتبص عليه
وفكر محمود وهو بياخد كوز الميه، شكلها بقى أجمل لما فتحت عنيها
الف سلامه عليك
محمود __ الله يسلمك، مين جابني هنا؟
عايشه، رعد جابك هنا والغجريه عالجتك
فين رعد!؟
رعد بره نايم مع والدى، لحظه اديله خبر
انتى مين؟
انا عايشه
انسحبت عايشه للخارج ، تتبعها عيون محمود المتعبه
صحت رعد إلى دخل بسرعه اطمن على محمود وخده فى حضنه وقعدو يتكلمو مع بعض
الكلام اخدهم لحد بعد الفجر
والباب خبط.!!
رعد وقف مزعور لكن عايشه قالت اتفضلى يا داريا
دخلت داريا، طول الليل ما نمتش، عقلها مشغول وقلبها واجعها
عاينت الجرح واطمنت على محمود إلى كان ساكت مش بيتكلم
داريا مستنى محمود ينطق عشان تتكلم معاه
عايزه تقعد تبص فيه وتفضل جنبه ومحمود عنيه على عايشه بيفكر يا ترى شفتها قبل كده؟
رعد ___محمود لو تقدر تتحرك ممكن تقعد بره فى الهوا
محمود وقف وحاول يتحرك، ساعدته داريا وعايشه، واحده على اليمين قلبها بيدق بقوه وواحده على الشمال ماشيه بخجل
ووسطيهم قلب شارد
لما قعدو بره محمود قدر يحدد المكان إلى كان مختفى فيه بين الزراعات
وقال انه كان بيشوف البيت فى الجزيره وكان فيه نار بتولع كل ليله
عايشه بخجل، انا متعوده اولع نار بالليل واستنى والدى
محمود تعرفى انى كان نفسى اجى هنا من قبل ما اعرف حتى انتى مين؟
لما شفت النار مولعه قررت انى أزور البيت هنا بعد ما اقتل رعد
ارتفع الضحك، الكل ضحك الا داريا
قلبها كان موجوع وحاسه انها غريبه بينهم، الحزن سكن وشها وعنيها وقعدت ساكته من غير كلام بتسأل نفسها
طيب ليه مبيتكلمش معايا زى عايشه؟
دا حتى مفكرش يشكرنى انى داويت جرحه؟
حست نفسها عايزه تعيط لما شافت نظرات رعد لحنان
نظرات كلها حب
كان بينتهز اى فرصه عشان يقرب منها ويتكلم معاها او حتى يلمسها
ومحمود سرحان فى تفاصيل عايشه، شارد لبعيد، يا ترى هى دى إلى كنت بدور عليها؟
وممكن الاقى سعادتي معاها؟
لما محمود فتح بقه وسأل عايشه انتى مخطوبه قلب داريا وقع فى رجليها
ولما عايشه ردت بخجل لا!؟
روحها طلعت منها