ويخرج ويبدأ واحد منهم يتكلم
– بص يا باشا احنا حرامية وسوابق كمان ، امبارح جالنا واحد شيك كدا وعنده عربية وادانا صورة الانسة يارا و صورة سعادتك وقالنا على
مكان الانسة يارا
وقالنا اخطفوها وودوها على المكان اللى معاك فى الورقة ده
محمد : تمام كمل
– وقالنا لو شوفتوا اللى فى الصورة ده معاهم، خلوا بالكم منه لانه ظابط ولو اتكلمنا او اتمسكنا هنموت
محمد بإبتسامة : حلو اوى ، ومين بقا اللى جالكم ده
– مانعرفش والله يا بيه بس هو كان لابس قميص ابيض وبنطلون چينس
محمد بعصبية : وانا لما احب ادور عليه اقول والنبى محدش شاف واحد لابس بنطلون چينس وقميص ابيض
– والله يا باشا هو ده اللى شوفناه ومانعرفش هو مين
محمد : ونمرة العربية
– ماخدناش بالنا منها يا باشا ، كل اللى نعرفه ان احنا كنا هنسلم الانسة يارا فى العنوان اللى مع سعادتك ده النهاردة الساعة 5
محمد بجدية : سيبك من العنوان ده ، انا كدا كدا رايح،
انا عايز بس اسألكم سؤال حلو كدا ويبقى خلصت معاكم
– اتفضل يا باشا
محمد بإبتسامة : الظابط جمال اللى كان هنا من شوية تعرفوه
الاتنين يبصوا لبعض بخوف
محمد بنفس الإبتسامة : ايه، السؤال صعب؟
______________________________________________________________________________