انا بصحى بدرى قبلها لانى بنام فى الصاله، عشان كده بحضر الفطار واصحيها قبل ما اسرتها توصل
فطرنا وخرجت فى الشرفه ادخن سيجاره، شفت عربية والدها وقفت ونزلو منها، دخلت عشان استقبلهم
فتحت الباب والدتها سلمت عليه بقرف، ووالدها راجل محترم خدنى بالحضن وقعد يسألنى عامل ايه يا عريس؟
قلتله كله تمام الحمد لله
قالى وهو بيقعد متقلقش كل حاجه هتكون تمام وبنتنا بنت أصول
كان كلام غريب لكن قلت
عارف ان بنتكم بنت أصول عشان كده اخترتها
نور دخلت هى وحماتى يعملو شاى فى المطبخ، انا وحمايا قعدنا ندردش فى حال الدنيا
خرجت حماتى من المطبخ اولآ ونور وراها مكسوفه ووشها كله احمر
حماتى عماله تقول بصوت مسموع مينفعش كده، إلى عنده مشكله يحلها
مرضتش اعلق لانى مش فاهم حاجه
خدت نور على جنب، بسألها فيه حاجه؟