هاتيها يا امي هاتيها اعدلها هدومها دي احسن سيرين لو شافتها كدة مش هيكفيها محاضرة من هنا للمغرب
لقيتها جايه خارجة من البيت وهي بتعدل طرحتها على دماغها
_ هاتيها يا امي هاتيها …اهي جت اهي
_ ايه يا ماما مش هنتغدا
_ خلصتوا الغدا يا ضنايا
_ ايوا انا طفيت عليه اهو وريم بتعمل السلطة
قامت وقفت
_ طيب هقوم الحق العصر تكون ريم خلصت وتكونوا حطيتوا الغدا
قعدت مكانها جنبهم في الهوا واخدت البنت من ايدة لقيت ايديها كلها تراب وهدومها
يا دي النيله انا عارف هي هتقول ايه …ايه يا احمد دة …بذمتك دة منظر
_ ايه يا احمد دة … بذمتك دة منظر…يعني اسيب البنت معاك نص ساعة ارجع القيها كدة
_ ولا كلمة الله يخليكي انا مصدع لواحدي …هقوم انا اغيرلها هدومها واخلص
_ شكرا مش عايزة منك حاجه…هقوم انا احميها و اغيرلها
وفعلا اخدت البنت ودخلت…ابتسمت الحمد لله هربت من محاضره النهاردة عن كيفية الحفاظ على الست چوري وملابسها من التراب ..فردت جسمي على الحصيرة في الهوا الجميل دة مع ريحة الزرع اللي رايحه وجاية تشفي العليل دي وتريح التعبان
حطيت ايدي تحت دماغي و غمضت عيني اهو الواحد يقيل شوية على ما يحضروا الغدا ..اتغدا واخد عربية عم متولي بالحمار اروح اجيبلها اللي هي عايزاة وبعدين ….
قطع حبل افكاري وترتيبي وانا مغمض عيني الصوت الغريب عن لهجة البلد دة
_ سلام عليكم…من فضلك متعرفش ازاي اوصل لمنزل السيدة سيرين بهجت كامل؟
فتحت عيني على الصوت اللي بيسال عليها وعلى اسمها دة لقيته استاذ محترم كدة ولابس بدلة وفي ايدة شنطة تشبه شنطة العمل والشغل …قومت وقفت
_ خير يا فندم
_ منزل السيدة سيرين قالولي انها متزوجة هنا بس الحقيقة مش معايا عنوان البيت بالتفصيل
تستمر القصة أدناه
_ انا ابقى زوجها …خير مين حضرتك..وعايز سيرين في ايه
لقيته اتنهد وابتسم
_ الحمد لله حضرتك زوجها ابقى انا كدة وصلت ..ياراجل قاعدين في اخر البلد ولا ايه …دة انا بلف عليكم من الصبح
بصتلة باستغراب و قلq… مين دة وعايز سيرين في ايه,؟!
……………………….
_ تعالي يا سيرين… تعالي يا حبيبتي
دخلت على استحياءوكسوف مخالط للقلق باين على وشها وجت قعدت جنبي
_ خير يا احمد مين الاستاذ وفي ايه؟
_ الاستاذ مُصر ميتكلمش الا لما انتي تبقى موجودة
بعدين بصتله
_ خير يا استاذ…تقدر حضرتك تتكلم بقى وتقول في ايه؟!
_ مدام سيرين… حضرتك طبعا على علم بوفاة ابنت عمك المرحومة علا محفوظ و اكيد برضه على علم بوفاة ابن عمك شريف بعد تنفيذ حكم الاعدام فيه لتسببه بقتل اخته مع سبق الاصرار والترصد .
بصيتلها لقيتها ملامحها اتخطفت دايما اول ما بتيجي سيرتهم …اخر حاجه وصلتلنا عنهم الحكم بالاعدام على شريف بعد ما التحقيقات اثبتت انه كان متعمد قتلها كونة متربصلها في الشركة وصوته في تسجيلات المكتب الخاص بالسكرتير بتاعها اللي توعدلها فيه بالقتل وهو بيزقها …رغم كل اللي عملوا فيها لكن كل ما تيجي سيريتهم بلاقي جسمها تلج و انكماش ظهر عليها
_ هو حضرتك بتفكرني بكل دة ليه دلوقتي…عايز مني ايه
لقيتها بتقولها بعصبية وقلق حطيت ايدي على ايديها اهديها
ووجهت كلامي لية
_ حضرتك برضة مقولتش عايزنا في ايه
سكت شوية بعدين بصلها
مدام سيرين..انا اسف عمك تعيشي انتي
لقيتها شهقت بخضة كدة …بقت اي حاجه متعلقة بسيرتهم وبيهم تخض
بعدين بصتلي بعيون حزينة حيرانه
_ سلام عليكم…يا مرحب يا مرحب
قومت اخد صينية الشاي من امي …لاحظت سيرين ووضعها لقيتها قربت منها وبصت للاستاذ دة
_ في ايه مالك يا بنتي … هو مين الاستاذ يا احمد وعايز من مراتك ايه؟!
_ الاستاذ يا امي جاي يبلغها بوفاة عمها
_ لأ مش بس كدة يا استاذ احمد… الحقيقة انا جاي ابلغها كمان ان من بعد وفاة عمك يبقى حضرتك الوريثة الوحيدة لثروتة بعد اولادة
التفت انا وسيرين مع بعض ليه …هو قال ايه