سكان العمارة بدأوا يتسرسبوا جري على تحت ، لقيت نفسي تلقائى عايزة انتقم منهم كلهم ، بصيت على الساعة على الحيطة لقيت الوقت بيجرى بشكل غير طبيعى ، اتلفِت للشباك لقيت النهار بيجي وراه الليل فى ثوانى ، طار التنين وهو مربوط بالحبل السري من الشباك ، وحرق كل سكان العمارة اللى موجودين تحت البيت ، ورجع جوه بطنى على طول .
لقيت ماجر، الراجل اللى شوفته فى المقابر واقف على باب الشقة ، من نظرة واحدة منه ، لقيت نفسي تلقائى بترمي على ضهرى على الارض ، ابتسم بسماجة وقالي:
.. جه وقت الولادة يااميرة ، اطلقي اللى فى بطنك وطلعيه للحياة ، خرجي ناقل الروح
فتحت رجلي وبدأ الطلق يزيد بشكل غير طبيعى وكأنى فى حالة ولادة حقيقية ، الم فظيع ، حسيت ان روحى بتخرج مني ، بدأ ماجر يقول طلاسم مش قادرة استوعبها ، كل مابيتكلم كل مابيزيد الطلق وبيخرج حتة من الجنين لبره ، ومع خروج راس الجنين ،
لقيت طفل صغير اعتقد انه اقل من سنتين دخل جري من باب الشقة وفى ايده سكينة ومع خروج راس التنين من رحمي ، ضربه بالسكينه وقطع راسه وبقت على الارض ، فى ذهول من ماجر ، اللى بعدها بثوانى لقيت سكينة اتضربت فى رقبته وببص على اللى قتله جارى اللى كان واقف مذهول وبيبص على بطنى قدام باب المطبخ فى وقت ماكانت الدنيا والعة ، فضل جسمي يتهز جامد ، وبيترعش بدرجة مش معقوله ، الد*م نازل من بين رجلي لكن نقط بسيطة ،
اتنين من الشارع سامعة صوتهم وهما بيتكلموا مع بعض وبيقولوا … انقلوها بسرعة فى الاسعاف ، وهو جه قالى : انا عالم روحانيات يااميرة بس الحمد لله ربنا الهمنى بموهبة التحكم الروحى ، انا طول الوقت كنت متابعك من بعد ماشوفت الحمل جوه بطنك ، انا قرأت الكتاب قبل كده وربنا بيسبب الاسباب ، ناقل الروح حقيقة ، لكن ربنا اكبر حقيقة ، واللى عايزه ربنا هو دايمًا اللى بيكون ، وكفاية اوى تمشي فى الطريق اللى خلاكى دخلتى فى الدايرة دى .
من بعد كل اللى حصل وانا بصلى وبدعي ربنا يغفرلى ويسامحنى على كل اللى عملته فى نفسي والناس اللى اتاذت بسببي وعارفة ومتأكده ان ربنا غفور رحيم .
الحمد لله حسيت بطهارة جوه قلبي كبيرة ، وبعد مرور ايام قليلة ببص من الشباك لقيت شجرة مزروعة وسط جنينة الفيلا اللى قدامنا اول مرة اشوفها على الحقيقة لكن فاكرة كويس اوى ان وانا بقلب فى الكتاب شوفتها فيه قبل كده ، بعد ثوانى سمعت صرخة جاية من ناحية الفيلا وواحدة من سكان الفيلا اسمها سميرى خرجت تلطم فى الجنينة ومسكت ايد اختها وقالتلها وهي بتعيط ومنهارة ، مش قولتلك ان ابن البواب بتاعنا قالي……
تمت بحمد الله