بدر سايق العربية وزهرة جنبه
بدر : ممكن أفهم انتي ايه نزلك من البيت وانتي في الحالة دي ؟؟؟
زهرة باصة قدامها ومبتردش
بدر : على فكرة انا بتكلم
زهرة : وعلى فكرة انا مش عايزة أرد
بدر : لا والله ؟ تبقى في الحالة دي ومتدهولة بالمنظر ده وتنزلي وتقعي في الشارع وانا اكلمك مش عايزة تردي كمان!!
زهرة : بقولك ايه
هو انت مش هددتني باختي واجبرتني اوافق اتجوزك ووافقت فعلاً وهنتنيل نتجوز بكرا ؟؟؟
بدر : حصل
زهرة : يبقى متتكلمش تاني بقا وسيبني في حالي ممكن
بدر : اسيبك في حالك وانتي كلها سواد الليل وتبقي مراتي ؟
زهرة : بلا مراتك بلا بتاع .. دماغك بقا
بدر بيلف وشه بيبص من شباك العربية وهو بيلف الدريكسيون : لو بتكلم فكهاني هتعامله احسن من كدا اقسم بالله بعد نص ساعة وصلوا عند البيت **
بدر نزل من العربية ولف فتح الباب الناحية التانية عشان ينزلها ، لسة هتحط رجلها عشان تنزل من العربية
راح مطلع رجلها تاني ووطي عشان يشيلها
زهرة بتزقه : انت بتعمل ايه؟؟؟؟؟
بدر : الدكتور قال لازم ترتاحي راحة تامة النهاردة يعني رجلك مش هتتحط في الأرض
زهرة : وانا مش هسيبك تشيلني يابد…
بدر بيقاطعها وهي بتتكلم وبيشيلها ويقفل باب العربية برجله وبيطلع العمارة
هنختصر بقيت الأحداث اللي حصلت لما طلعوا عشان نركز في الأهم
تاني يوم (يوم الفرح )
زهرة بتبدأ تصحى من النوم لما حست بالشمس طلعت وملت الاوضة نور .. بتفتح عينيها
لقت عبير في وشها
زهرة بتتخض : بسم الله الرحمن الرحيم
بتدعك عينيها : ايه ياماما واقفة كدا ليه
عبير بتريقة : صباح الخير ياعروسة
ايه ياختي شوفتي عفريت ؟؟
زهرة : لا اتخضيت بس لما فتحت عيني لقيتك قدامي
عبير : سلامتك م الخضة ياعينيا .. لا عايزاكي تنشفي كدا ده النهاردة فرحك علي الغالي
**زهرة بتنزل عينيها في الأرض بحزن **
مها داخلة الأوضة : عروستنا صحيت أخيرا .. يلا قومي اجهزي ياعروسة ورانا حاجات كتير زهرة بتبصلها بإستغراب !!**
وبتفتكر قبلها بيوم لما غرزت السكينة في جنبها وكانت هتقتلها
مها : مالك متنحة ليه كدا ؟
زهرة : مستغرباكي يامها بصراحة.. المفروض دلوقتي تكوني اكتر إنسانة كرهاني مش بتقوميني عشان اجهز
مها : لا مانا الصراحة قلبتها في دماغي كدا ولقيت ان مدام ربنا عمل كدا يبقي دا اكيد خير لينا احنا الاتنين وفي الآخر خلينا متفقين دا نصيب
زهرة : فعلا ؟
فريد داخل الأوضة: انتي ايه اللي جابك هنا يابت انتي
انا مش قولتلك متهوبيش ناحية أوضة زهرة لحد ما تتجوز وتروح بيتها ؟؟
عبير : جرا ايه يا فريد ما تتعدل
فريد : اتعدل واستناها تحاول تقتلها تاني زي ما حصل امبا..
زهرة بتقاطعه : فريد … خلاص اللي فات مـaـت ومش هنتكلم فيه تاني وانا بقيت احسن الحمدلله
وهما بيتكلموا الباب خبط … راحت عبير تفتح الباب
**ناهد ام بدر داخلة أوضة زهرة وفي ايديها شنط**
زهرة بتتعدل
ناهد: لا لا خليكي زي مانتي انا زي امك ياحبيبتي
انا جاية ومعايا كل حاجة ممكن تحتاجيها من فستان فرح لمكياج لاكسسوارت لـ كل حاجة
زهرة بصدمة: تعبتي نفسك ياماما ايه كل ده
ناهد : مش انا اللي نقيت طبعاً انا ست كبيرة مفهمش في الكلام بس كان معايا حد يعز عليه أمرك اوي وهو كان بينقي الحاجات وبياخد رأي البنت الموجودة في المحل كمان عايزينك تكوني أميرة النهاردة وتلوحي اي حد هيبص عليكي
زهرة بصالها مستغربة اللي هي بتعمله وانها تقبلت عادي فكرة ان ابنها يغير واحدة ويتجوز اختها !!
ناهد : يلا قومي معايا بقا هدخلك تاخدي شاور في السريع كدا وابدأ اجهزك عشان كتب الكتاب هيبدأ الساعة 5 خلاص مفيش وقت
**عبير ومها بيبصولها بـ غل واستغراب **الساعة 5
زهرة واقفة قدام باب الشقة .. لابسة فستان فرح تركي سيمبل وعاملة ميك اب هادي وفي نفس الوقت طالعة زي الملاك الأبيض
ناهد : زي القمر ياحبيبتي ربنا يحميكي من العين
زهرة : انتي اللي ليكي الفضل في ده كله يا ماما .. ربنا يخليكي ليا
عاصم واقف بيبص علي زهرة وعينه مدمعة
ناهد : يلا عشان منتأخرش عليهم ؟
**زهرة لسة هتتحرك عشان تنزل فريد وقف قدامها **
فريد : زهرة احنا لسة فيها .. فكري ياحبيبتي انتي لسة معاكي وقت
زهرة بتبصله وعينيها بتدمع
فريد : يازهرة ابوس ايديكي متدمريش حياتك وسعادتك ولو فيه حاجة هنحلها
زهرة بتحضنه وبتتماسك : اختك قد اي حاجة يا فريد وراضية بنصيبها أيا كان .. هتوحشني يافريد
فريد بيحضنها وعينه بتدمع وهو مش عارف يعملها حاجة
مها واقفة بصالهم ومبتسمة ابتسامة عجيبة .. عبير عمالة تبصلهم وتبص لـ مها باستغراب !!
الكهربا قطعت في المكان كله والدنيا ضلمت كُحل **
حصل ارتباك في المكان كله وإدارة الكافيه بقوا مستغربين ازاي المولد مشتغلش كل ده وفضلوا دقايق يجروا في الكافيه كلهم بيحاولوا يتصرفوا لحد ما قدروا يرجعوا الكهربا
بدر بيبص جنبه …
وزي ماحنا كلنا متوقعين .. ملقاش زهرة
بدر برق وبدأ يبص حواليه في وشوش كل الناس يدور عليها .. ملقاش اثر ليها وكأنها فص ملح وداب “””
بدر بيلف في الكافيه يدور عليها
و بخضة وصوت عالي : زهرررررررررررة
زهرة فيييين ياجدعان كانت لسة جنببببي كله يدور عليها بسررررعة
اللي قاعد قام يدور واللي واقف بقى بيجري يبص يمين وشمال .. مها بتبسم من تحت لتحت وبتغمض عينيها وتاخد نفس عميق
عاصم بيقعد ع الكرسي اللي وراه بصدمة ومن غير ما ينطق ولا كلمة
ناهد : مراتك فين يا بدر .. ما كانت لسة جنبك راحت فييين
فريد بيبص لـ مها : اختك فين ؟؟؟
مها : يووووه وانا ايش عرفني هو كل مصـiبة هتلبسوها فيا
بدر : قولتهالك امبارح يا مها وهرجع اقولهالك تاني في موقف مختلف .. اقسم بالله يا مها لو طلعتي ورا اختفاء زهرة ما هخلي فيكي حتة سليمة فلو تعرفي عنها حاجة الحقي نفسك وقوليها بسرررعة عشان نلحقها عبير : يا سلام هو كل ما ست الحسن هتختفي هتتهموا بنتي في ااايه ماهي واقفة جنبك زيها زيك هتكون عملتلها ايه يعني
تلاقي عروستك المصونة خلعت من الفرح بعد ما وصلت لهدفها
فريد : خلعت ازاي يعني ياماما احنا هنهزر ، وايه هو هدفها اصلا
عبير : هدفها تبوظ جوازة اختك والسلام واول ما لقت الموضوع دخل في الجد واتكلبشت في جوازة هربت
فريد : ماماااااا متطلعنيش عن شعوووووري
بدر : بااااااااس .. مش عايز اسمع صووووت انا مراتي اتخطفت من جنبي وانتو واقفين تتخانقوا احنا في ايه ولا في اااايه ، انا عايز كله يسيب اللي في ايده ويدور معايا عليها مش هنسيب طرف إبرة في المنطقة مش هندور فيه